ఓం నమశ్శివాయ
(కందములు)
*ఓం* .
ఓంకారాత్మకు డగుచును
సంకటముల నణచివేసి సర్వవిధాలన్
గింకరులను రక్షించెడి
శంకరునకు వందనములు సర్వేశునకున్. 1.
*న* .
నమ్మినవారికి క్షేమం
బిమ్మహిని నిరంతరముగ నింపగురీతిన్
గొమ్మని యొసగెడి యా భూ
తమ్ముల పతికొసగుచుంటి దండములవిరుల్. 2.
*మ* .
మనుజుడు జలములు నాకులు
కొనుమని యొసగంగ మిగుల కూర్మిని వానిన్
ఘనములని స్వీకరించుచు
ననుపమ సంపదలొసంగు నభవునకు నతుల్. 3.
*శి*
శిరమున గంగను దాల్చితి
వరయగ దేహార్థమందు నంబను గళమం
దురుతరభీతావహమగు
గరళంబును నిల్పు రుద్ర! కైమోడ్పు లయా! 4.
*వా*
వాదేల నిన్ను మించిన
మోదప్రదు లొక్కరైన మును నిపుడైనన్
మేదినిపయి గనరా రిట
నీదయ చూపించుమయ్య నీకివె ప్రణతుల్. 5.
*య*
యజనముల గతుల నెరుగను
నిజమిది పూజాదికములు, నిష్ఠల విధముల్
స్వజనోద్ధారక! నేర్వను
త్రిజగత్పతి! కావుమయ్య దేవా! మ్రొక్కుల్. 6.
హ.వేం.స.నా.మూర్తి.
11.03.2021.
No comments:
Post a Comment