శ్రీ వేంకటేశ్వర

శ్రీ వేంకటేశ్వర

చంద్రకళ వృత్తము

గణములు -- ర,స,స,త,జ,జ,గ 

యతి -- 1,11

ఏడుకొండల పైనను దేవా! యింపుగ నుంటివి శ్రీపతీ!

వేడుకొందుము నిన్నిదె రావా వేదన ద్రుంచగ శీఘ్రమున్

చూడవేలనొ కావగలేవా శోక మణంచుచు భక్తులన్

గోడు పెట్టుట చూడగ బోవా కూర్మిని కొంచెము పంచవా

నీడ నీయగ వేడెద నయ్యా నిన్నెపు డాదర మొప్పగన్

రాడు గావడు రాడను మాటన్ రక్షకు డౌచును ద్రుంచవా

కూడుగుడ్డలు చూప వటయ్యా కుందుచుండెడి వారికిన్

మోడువారిన జీవన మందున్ మోదము నింపుచు బ్రోవవా

ఏడ జూచిన సంఘము నందున్ హేయముగా నవినీతియే

చీడ బట్టిన ధారుణి కీవే క్షేమము గూర్చగ నొప్పగున్

పాడుకొందుము నీ మహిమంబున్ పాపము గూల్చుము హే ప్రభో!

వాడు వీడను భేదము లేలా పౌరుల కెల్లెడ ధారుణిన్

కీడు చేసెడి భావన లేలా కేవల మన్నిట స్వార్థమే

నేడు చూడగ లోకుల లోనన్ నిత్యము నిండిన దక్కటా

పాడుబడ్డ మనంబుల లోనన్ పావనతన్ మరి నింపగా

లేడు శ్రీకర! వేంకట నాథా! లేడిల నీసము డెవ్వడున్

ఏడు కొండల నెక్కెద మయ్యా ఈశ్వర! రక్షణ చేయుమా

వాడిపోయిన భావము లెల్లన్ వైభవ మందగ నిల్పుమా

బీడు వారిన ధారుణి లోనన్ విస్తృత సత్ఫల మిచ్చుచున్

వీడి పొమ్మన కుండగ మమ్మున్ వేడెద చల్లగ చూడగన్.

బాదుషా

బాదుషా

 ఆటవెలదులు

మధుర మౌచు సతము మానసం బలరించు

చుండి యంద మొలుకు చుండు రూప

మంది యుండునట్టి యత్యున్నతంబైన

బాదుషాకు జయము పలుక వలయు.              ౧.

ఒంపు లంది యుండి యొయ్యారి కత్తెయై

తనను జూచు వారి మనము దోచి

చెంత జేరి మిగుల సంతసంబును గూర్చు

బాదుషాకు జయము పలుక వలయు.              ౨.

పెండ్లిలోన నైన పేరంట మందైన

సర్వజగతిలోన బర్వియుండి

పిండివంట లందు పెద్దయై చరియించు

బాదుషాకు జయము పలుక వలయు.              ౩.

రమ్యమైన దిలను రాణి యన్నింటను

మధురభక్ష్యరాశి మధ్య జేరి

మనుజకోటి నెల్ల తనదాసులను జేయు

బాదుషాకు జయము పలుక వలయు.              ౪.

నాటినుండి భువిని నేటి కాలముదాక

పోటి పడగ దలచు భోజ్యవస్తు

జాలమందు జూడ సర్వోన్నతంబైన

బాదుషాకు జయము పలుక వలయు.              ౫.

ఎట్టు లైన పొంది లొట్టలు వేయుచు

పిన్నవార లైన పెద్ద లైన

భాగ్య మొదవె నంచు భక్షింపగా జూచు

బాదుషాకు జయము పలుక వలయు.              ౬.

దేహదీప్తి చేత మోహంబు పుట్టించి

రుచిని మించి మిగుల శుచిని జూపి

కవుల హృదుల జేరి కవితలు పలికించు

బాదుషాకు జయము పలుక వలయు.              ౭.

పెరుగు నేతు లందు సురుచిరంబైనట్టి

మైదపిండి యటులె మోదమొసగు

పంచదార గూడ  నంచితంబుగ నుండు

బాదుషాకు జయము పలుక వలయు.              ౮.

తనను తినెడి వారి కనుగుణంబైనట్టి

మార్దవంబు తోడ మమత జూపి

విమల మతిని బ్రజకు బ్రియతరంబైవెల్గు

బాదుషాకు జయము పలుకవలయు.               ౯.

సందియంబు లేదు స్వాదు భక్ష్యంబుగా

యశము నందు చున్న దవనిలోన

సాటి లేని రీతి మేటియై తలపించు

బాదుషాకు జయము పలుక వలయు.              ౧౦.

హ.వేం.స.నా.మూర్తి.

నాదేశం

నాదేశం

ఛందము-ఇంద్రవజ్ర

ప్రేమింతు నెల్లప్పుడు వేదభూమిన్

క్షేమంబు లందించెడి శిష్ట ధాత్రిన్

శ్రీమంతమై యొప్పెడి శ్రేష్ఠ సీమన్

ధీమంతమౌ భారత దివ్యగోత్రన్.

సర్వార్థసంధాయిని! సత్త్వ యుక్తా! 

నిర్వాణ సౌఖ్య ప్రద! నిత్య దీప్తా!

పర్వావళీ సంయుత! భాగ్యదాతా!

సర్వోత్తమా! దండము సార్ద్రచిత్తా!

వేదంబు లిచ్చోటనె విస్తరించెన్

నాదంబు లీనేలనె నాట్యమాడెన్

మోదంబు లీపృథ్విని ముచ్చడించున్

శ్రీదుండు నిద్ధారుణి సేవలందున్.

ఏనాడు గావించితి మెంత పుణ్యం

బీనాడు జన్మించితి మీ ధరిత్రిన్

నానాప్రకారంబుగ నైతికత్వం 

బీనేలపై నేర్చితి మింపుమీరన్.

దండంబు వేదస్తుత! ధన్య! నీకున్

దండంబు దీప్తిప్రద! తథ్య! నీకున్

దండంబు ధర్మస్థిత! దార్ఢ్య! నీకున్

దండంబు హే భారత ధాత్రి! నీకున్.