స్వాతంత్ర్య అమృత మహోత్సవము

సీ.మా.

శ్రీలకు నిలయమై చిత్కళావాసమై

ప్రఖ్యాతిగాంచిన భవ్య భూమి

వేదశాస్త్రాలలో విస్తృతవిజ్ఞాన

మవనికందించిన యట్టి భూమి

పౌరాణికములౌచు సారవంతములైన

శుభకర్మలకు తీరు చూపు భూమి

సంస్కారమును నేర్పు సంస్కృతీ విభవంబు

బహుళవాత్సల్యాన పంచు భూమి

ధర్మస్వరూపమై నిర్మలానందంబు

కూర్మిజూపుచు గూర్చు కర్మభూమి

మునిజనస్థానమై యనిశంబు పరహిత

మాత్మ నెంచెడి దివ్యమైన భూమి

ఆధ్యాత్మికతతోడ నఖిలప్రపంచాన

భాగ్యమ్ము నిత్యమ్ము పంచు భూమి

పాడిపంటలతోడ పైరుపచ్చలతోడ

కలిమిని విఖ్యాతి గాంచు భూమి

స్వపరభేదములేక భాతృభావంబును

పరులకైనను గోరి పంచు భూమి

తే.గీ.

యగుచు నుతులంది వెలుగొందు నట్టి నాదు

భరతఖండంబు స్వాతంత్ర్య మరసి నేడు

డెబ్బదైదేండ్లు నిండిన వబ్బురంబు

గొలుపు నమృతోత్సవంబున వెలుగుచుండె

భరతమాతకు జేజేలు పలుకరండు

మనత్రివర్ణ పతాకము ననుపమముగ

నెగురజేయగ కదలుడీ జగతిలోన.

శా.

స్వాతంత్ర్యంబున కయ్యె సప్తతిపయిన్ పంచాబ్దముల్ నేడిటన్

చేతోమోదము సంఘటించినది సత్ క్షేత్రంబుగా వెల్గుచున్

ఖ్యాతింగాంచిన భారతావనిపయిన్ గల్యాణభావోన్నతిన్

బ్రీతిన్ సోదరులారరండు సమతన్ విశ్వంబునన్ జాటగన్.

సీ.

శాంతిసౌఖ్యంబుల చల్లని గాలులే

వేళనీ నేలపై వీచవలయు,

నిర్మలానందంబు ధర్మకర్మములందు

నిత్యమీ భువిపైన నిలువవలయు,

హర్షానుభవముల వర్షంబులిచ్చోట

నిరతమ్ము సర్వత్ర గురియవలయు,

స్వపరభేదంబుల ఛాయలీ భూమిపై

నిలువక శీఘ్రమ్ము తొలగవలయు

తే.గీ.

ఇట్టి భాగ్యంబు చేకూర్చ నెల్లవారు

ప్రతిన బూనుడు భారత పౌరులార! 

హర్షదంబైనయ మృతోత్సవాఖ్యపర్వ

మమరె నిచ్చోట స్వాతంత్ర్యమందు నేడు. 

రేపల్లె గురువందనము

 

మ.

తమలో నిండిన పాండితీవిభవమున్ తత్తద్విధానమ్మునన్

శ్రమయం చెంచక శిష్యకోటికి సదా సన్మార్గదంబౌ గతిన్

క్రమ మొప్పంగను బంచిరీ బుధజనుల్ కారుణ్యపూర్ణాత్ములై

"నమ" యంచీగురు పాదపద్మములపై నాశీర్షమున్ జేర్చెదన్

శా.

ఛాత్రస్థాయినెరింగి బోధనకునై సర్వానుకూలంబుగా

మైత్రిం జూపుచు మార్గమెంచి యెపుడున్ మాన్యుల్ లసద్విద్యలన్

స్తోత్రార్హంబగునట్లు బంచిరి వరాస్తోకానురాగాన మ

ద్గాత్రంబీభువి జేర్చి మ్రొక్కెద మహద్భావాఢ్యులన్ నిచ్చలున్.

చం.

వరగుణులౌచు శిష్యులను స్వాత్మజులన్నవిధాన నెంచుచున్

సురుచిరభావనాబలము జూపుచు యోగ్యములైన మార్గముల్

ధరణిని గాంచు శక్తినిడి తామొనరించిరి బోధనంబు నీ

గురువులు భక్తితో నతులు కూర్చెద  పద్యసుమంబులందునన్.

ఉ.

వీరికి సాటిరాగలుగు విజ్ఞులు లోకమునందు జూడగా

లేరను మాట సత్యమగు లేఖులతోడ సమానులైన యీ

కారణజన్ములన్ గొలుచు కాంక్షను జూపుచునుందు నిత్యమున్

జేరిచి వీరి పాదమున శీర్షము శిష్యుడనౌట వీరికిన్.

సీ.

రేపల్లె నిలయమై దీపిల్లె కళలకు

సాహితీభూమియై స్తవములందె

శ్రీశంకరాఖ్యతో శ్రీప్రదంబౌచును

విద్యాలయం బందు వెలుగులీనె

నచ్చోట సద్విద్య లరయంగజేరిన

వారికీ గురుజనుల్ తోరముగను

వాత్సల్యమును జూపి బహుళవిజ్ఞానమ్ము

పంచినారనిశమ్ము వరదులనగ

తే.గీ.

అట్టి గురువుల ఋణము నీ యవని లోన

నేమి యొసగిన దీర్చంగ లేము కనుక

వారు నేర్పించి యున్నట్టి వాక్యచయము

లందు నర్పించుచుంటిని వందనములు.

కం.

గురుచరణమె శిష్యులకిల

శరణము సర్వార్థదంబు జ్ఞానప్రదమై

నిరతము వరలును నేనా

చరణములకు మ్రొక్కువాడ సద్భక్తి నిటన్.