ఓం నమ శ్శివాయ హర హర మహాదేవ

 

ఓం నమ శ్శివాయ హర హర మహాదేవ

ఓం కారాకృతి వీవో

   శంకర! సురకోటివంద్య! సర్వారాధ్యా!

   సంకటహర! యభయంకర!

   వంకలు లేనట్టి భక్తి వరముగ నిమ్మా.

నవవిధ భక్తుల నెరుగను

  స్తవముల సాహిత్యదీప్తిసరణి నెరుంగన్

  శివ నీ నామస్మరణం

  బవనిని జేసెదను సతత మందుము ప్రణతుల్.

మరువకు నీదాసుడనని

  నిరతము జలములను దెచ్చి నిష్ఠాగరిమన్

  హర! నిన్నభిషేకించెద

  పరమాత్మా! నిన్ను జేరు వర మొసగుమయా!

శిరమున గంగను దాల్చిన

  సురవర!  నీరమును గొనుట చోద్యము గాదే

  నరు లొసగెడి జలములతో

  నరయగ నీకగునె తృప్తి యభవా! యిచటన్.

వాదేల నిన్ను బోలరు

  మోదము గలిగించు సురలు భూవలయమునన్

  సాదరముగ నిను దెల్పెడి

  వేదమె దీనికిని సాక్షి విశదచరిత్రా!

యతులకు నారాధ్యుండవు

  స్తుతు లందుచు రక్ష సేయు సురవరుడవయా

  సతతము నిను నిల్పెద మది

  నతులిత శివభక్తి నాకు నందించుమయా!

హరిహరులకు భేదంబును

  ధర నెవ్వరు దలచుచుంద్రు తప్పక వారిన్

  పరమాత్మ యొక్క డనియెడి

  స్థిరచిత్తము పొందజేయ జేరుము భువికిన్.

రయమున నీసేవకులకు

  జయసంతతి గూర్చునట్టి సన్నుతకీర్తీ!

  భయహర! భవనాశంకర!

  ప్రియవచనా! భక్తసులభ! వేవేలనతుల్.

హర! శంకర! మహిమాకర!

  వరదాయక!  సకలలోకవందిత ప్రణతుల్

  కరుణామయ!  శుభసంచయ!

  గిరిపుత్రీహృదయనాథ! క్షిప్రశ్రీదా!

రమ్యాంతరంగ! గంగా

  కామ్యద! సురలోకపూజ్య! కవికులవినుతా!

  సమ్యగ్రీతిని బుధజన

  గమ్యా! యిట జూపుమయ్య! కాంక్ష లణంగన్.

మమతానిలయా! మదిలో

  సమతాభావంబు నిల్పు శక్తి నొసంగన్

  సుమధురభావస్థిరు నిను

  సమధికసద్భక్తి గొలుతు సంతోషముతోన్.

హానిని గూర్చెడి కృత్యము

  లేనాడును జేయకుండి యీశ్వర! నిన్నే

  యానందంబున గొలిచెడి

  ధ్యానము నామదికి నొసగు మగజానాథా!

దేవా! భావాతీతా!

  నీవే దిక్కంచు నిలిచి నిష్ఠాయుక్తిన్

  సేవించెడి సద్భక్తిని

  కైవల్యద! జనుల కొసగి కావుము తండ్రీ!

వనజాక్షుడు స్థిరమతియయి

  నినుగొలువ ననుగ్రహించి నిస్తులశక్తిన్

  మనదగు చక్రాయుధమును

  గొనుమనుచు నొసంగినావు కూర్మిని రుద్రా!

08.03.2024

ఓం నమశ్శివాయ

 🙏🏻🙏🏻

ఓం నమశ్శివాయ

శా.

శ్రీకంఠా! మునిసేవితా! సురవరా! చిత్సౌఖ్యదా! శంకరా!

లోకేశా! పరమేశ్వరా! స్మరహరా! రుద్రా! యుమానాయకా!

నీకై మ్రొక్కెద, నిత్య మచ్ఛజలమున్ నీశీర్షమం దుంచుచున్ 

సాకన్ వేడెద భక్తకోటిని కృపాసారమ్ముతో నెల్లెడన్. 1.

శా.

కార్తీకమ్మిది కామితార్థఫలదా! కల్యాణసద్భావనా

స్ఫూర్తిన్ నామదిలోన నింపి  నిగమస్తోత్రా! నినున్ గొల్చుచున్

ధూర్తశ్రేణిని జేరకుండు గతి నస్తోకంబుగా గూర్చి స

త్కీర్తిన్ గాంచెడి భావమున్ నిలుపుమా క్షేమంకరా! శంకరా!    2.

శా.

సర్వారాధ్యుడ వీవు లోకములలో శర్వా! దయాసాగరా! 

ఉర్వీక్షేత్ర మధర్మకార్యములతో  నున్మాదకృత్యాలతో 

గర్వాంధోరుదురాగతస్థితులతో కైవల్యదా! నిండె నీ

దుర్వాంఛాగములన్ హరించి బుధసందోహంబులన్ గావుమా. 3.

శా.

రుద్రాధ్యాయజపంబు చేయు బలిమిన్ లోకేశ్వరా! చూపుమా

భద్రాకార! త్వదీయసేవకునకై భక్తాళిసంరక్షకా!

నిద్రన్ మున్గిన జ్ఞానశూన్యుని ననున్ నీవే కృపాదీప్తితో 

రుద్రా! చూడు మటంచు మ్రొక్కెదను చిద్రూపా!  మహద్వైభవా! 4.

మ.

కరిచర్మాంబర! నన్ను గావు మనుచున్ గాంక్షించుటల్ శంకరా!

వరదాతా! మతిహీనుచర్యలు మహాస్వార్థైకభావంబు లా

కరణిన్ మాని భజించుచుంటిని నినున్ గైవల్యదంబైన త్వ

చ్చరణద్వంద్వము బట్టు భాగ్య మిడి నీసాయుజ్యమున్ గూర్చుమా. 5.

మ.

మనుజశ్రేష్ఠభవం బొసంగితివి సన్మానంబు చేకూర్చుచున్

నను నీవానిగ స్వీకరించితివి యున్మాదస్థితిన్ గూల్చుచున్ 

నిను సేవించెడి భాగ్య మిచ్చితివి సన్మిత్రాళిసంగంబుతో 

ననునిత్యంబును శంకరా! ఇవియె నాహర్షోన్నతీహేతువుల్. 6.

మ.

జటలందించితి వా సురాపగకు వాసం బందు జూపించుచున్

నిటలాక్షా! గిరిజాసమర్పణ ముగా నీదేహమం దర్థమున్

పటుచెల్మిన్ గొనజేసినాడవుగదా! భాగ్యప్రదా! నేను సం

కటనాశం బొనరించు నీకృప నిటన్ గాంక్షింతు నాకీయవే. 7.

శా.

బోళాశంకరు డీసురేశు డనుచున్ బూర్ణైకసద్భక్తితో 

గాళీనాయక! కొల్చువారల మహత్కాంక్షాసమూహమ్ము లే

వేళన్ దీర్చెడి వానిగా జగములో విఖ్యాతి నీకందె వాం

ఛాళిన్ దెల్పను త్వత్కృపావిభవమే చాలంచు హర్షించెదన్. 8.

మ.

సురముఖ్యుల్ వినుతించ సర్వజగముల్ శోభిల్ల శీఘ్రమ్ముగా

గరళమ్మున్ గొనినావు భక్తజనసంఘశ్రేణులన్ బ్రోచుటే

నిరతానందదకృత్యమంచు మదిలో నీవెంచుటల్ శంకరా! 

యరయం జాలము దేవతాన్యములలో నర్పింతు నీకు న్నతుల్. 9.

పరమానందము నీకథాశ్రవణమే భాగ్యాబ్ధి నీనామమే

నిరతౌన్నత్యదమై ఫలించును గదా నీదర్శనం బీభువిన్

స్థిరసత్కీర్తికి హేతువై వెలుగు నిన్ సేవించుటల్ గావునన్

హర! గౌరీవర! శంకరా!  భవహరా! యందింతు గైమోడ్పులన్. 10.

🙏🏻🙏🏻

హ.వేం.స.నా.మూర్తి.

22.11.2023.

దసరా

 సీ.

విల్లమ్ములే లేవు విద్యార్థికరములం

దరయంగ నీవేళ నాంధ్రమందు 

పావలా బేడైన పట్టబో మనియెడి 

కమ్మని పద్యాలు కానరావు

హర్షాతిరేకంబు నంది గులాలుతో

నాటలాడుట లిప్పు డసలె లేదు

పులివేషములు కాన మలఘు నాట్యము లేదు 

సరససల్లాపాల వరుస లేదు

తే.గీ.

కాలపరివర్తనంబైన లీల గనుడు 

నాటి సందడి లేకుండ నవ్యజగతి

పర్వదినములు గమియించు వరుసలోన 

వచ్చిపోయెను దశహరా వాస్తవమ్ము.

శ్రీ శో భ కృ దా గ మ న ము న స్వా గ త ము

 

శ్రీ శో భ కృ దా గ మ న ము న స్వా గ త ము

శా.     శ్రీకల్యాణమయంబు తానగుచు సచ్చిత్సౌఖ్యమందించుచున్

             జీకాకుల్ తొలగించి స్వాస్థ్యవిభవశ్రీ లందగా జేయుచున్

             లోకంబందున శ్రేష్ఠహాయనముగా ప్రేమస్వరూపంబుగా

             నాకారమ్ము ధరించి వచ్చినది నూత్నాబ్దమ్ము శోభల్ గనన్.                              1.

ఉ.      శోభకృదబ్దరాజమును శుద్ధమనంబున స్వాగతించెదన్

             వైభవదీప్తి నెల్లెడల భవ్యవిధంబున జిమ్ముచున్నదై

             యా భవవిష్ణుముఖ్యులగు నాద్యసురావళివత్సలత్వ స

             త్ప్రాభవ మీ వసుంధరకు బంచగ వచ్చినదౌట బ్రీతితోన్.                       2.

శా.     భవ్యానందము మానవాళి కిచటన్ బ్రాప్తింపగా జేసి స

             త్కావ్యాంతర్గతధర్మకార్యకరణాకాంక్షల్ మదిన్ నింపుచున్

             దీవ్యచ్ఛక్తులు గూర్చి జీవనమునన్ దేజంబులన్ నిల్పగా

             నవ్యాబ్దంబును స్వాగతింతు నిచటన్ స్వాంతమ్ము హర్షించగన్.              3.

మ.     కృషకుల్ నిత్యము ధారుణీస్థలమునన్ క్షేమంబు చేకూర్చు స

             ద్విషయంబున్ గొని సస్యదీప్తి కొర కేవేళన్ నిరీక్షింతు రా

             ఋషులన్ గష్టములందు ద్రోయక కొనుం డీరంచు సద్వృష్టితో

             దృషలన్ దీర్చుము వర్షరాజమ! భువిన్ దివ్యానురాగంబుతోన్.              4.

ఉ.      దానవతేజ మీభువిని ధర్మము గూల్చగ విస్తరించె నే

             డో నవవర్షమా! యఘము లొప్పగు కార్యములట్లు చేయుటల్

             మాన మటంచు నెంచుచును, మానవజాతి మహోన్నతత్వముల్

             జ్ఞానము లెందుబోయినవి? సన్మతి గూర్చగ నిన్నువేడెదన్.                              5.

మ.     గతకాలం బది మేలటంచు జనముల్ కాంక్షల్ ఫలం బందకే

             ప్రతికూలత్వము గూడ నిన్ను గనుచున్ బల్మారు దూషించున

             ట్లతులానంతసుఖేతరంబులకు నీవాధారమై యుండ కీ

             క్షితిపై మంగళ మొప్పుగా నిలుపుమా! కీర్తింతు నూత్నాబ్దమా!                 6.

మ.     మనమం దెంచుచు సద్ధితంబు నెపుడున్ మాట్లాడ నద్దానినే

             గొనుచున్ గార్యములట్లె చేయు బలమున్ గూడంగ దక్షత్వ మీ

             జనులం జేర్చుము నూత్నవర్షమ! భువిన్ సన్మార్గగత్వంబు తా

             మనునిత్యంబు వహించురీతి గృపతో నత్యార్ద్రచిత్తంబుతోన్.                   7.

చం.    నరులను జేరి లోకమును నవ్యవిధంబున గష్టపంక్తికిన్

             నిరతము ద్రోయుచున్నయది నిస్తులమౌ యవినీతి కాంచుమా

             వరగుణ! యబ్దరాజమ! శుభప్రద! దానిని ద్రుంచు యత్న మిం

             దరయగ జేయుమా యనెద నాయతవత్సల వౌచు నిచ్చటన్.                 8.

 శా.     మున్నేరీతిని ధార్మికత్వ మిట నీ భూమిన్ మహద్దీప్తితో

             నెన్నం జాలగ నిల్చియుండినది నే డింపార నారీతిగన్

             ఛిన్నాభిన్నములైన సంస్కృతులకున్ జేర్చంగ దార్ఢ్యత్వ మా

             వెన్నున్ వేడగ రమ్ము నీ వనియెదన్ విఖ్యాత నూత్నాబ్దమా!                              9.

ఉ.      నమ్ముచు స్వాగతించెదము నష్టము శోభకృదబ్దరాజమా!

             క్రమ్మగ జేయ నెంచకుము కామ్యదవై శుభదప్రభావవై

             యిమ్మహి నీదుకాలమున నెంతయు బ్రీతిని గూర్చ వేడుచున్

             రమ్మని బల్కుచుంటి నిదె రమ్యవచస్సులలోన నీయెడన్.                      10.

ఉ.      స్వాతిశయోగ్రభూతమిట సర్వజగంబున విస్తరించి  ని

   త్యాతులదుర్గతుల్ జనుల నందగ జేయుచునుండె దానినే

   రీతిని ద్రుంచగావలయు, ప్రేక్షకపాత్రను దాల్చకుండ నో

   నూతనవర్షమా! యిట వినూత్నవిధంబున సంచరించుమా.                   11.

మ.     గతులన్ దప్పెను వేదశాస్త్రవిపులాఖ్యానప్రబోధక్రియా

   స్థితమాహాత్మ్యము లీ యుగాన జనులన్ జేరంగ దుర్భావనల్,

   వెతలన్నింటను నిండియుండెను మహద్విస్తారహర్షంబు దు

   ర్మతులం దంచు దలంచుచుండగను వర్షశ్రేష్ఠ! వీక్షింపుమా!                  12.

చం.    తనపెర భేదభావములు తప్పని పల్కుచు వేదికాస్థలిన్

   ఘనతరబోధనల్ సలుపగా జనువారలె జాతివాదమున్

   మనమున నుంచి సాగుదురు మాన్యులమంచు వచింత్రు వారికిన్

   గొనకొని సభ్యతల్ గరుప గోరెద శోభకృదబ్దమా! యిలన్.                              13.

చం.    మునుపటి రుగ్మతాస్థితియు, మొన్నటి యుద్ధకరాళనృత్యముల్

   ఘనతరవైపరీత్యము లకారణవైరము లుగ్రవాదముల్

   జనులకు భీతి గూర్చినవి సర్వవినాశము చేయబూని, నీ

   వనుపమశక్తిశాలివయి హాయనరాజమ! నిల్వుమా యిటన్.                   14.

                   ఉ.      శోభకృదబ్దమా! యిచట జూపితి నెన్ని సమస్యలో జగ

                   ద్వైభవదర్శనస్పృహను భావమునన్ గొనుదానవౌట నీ

                   శోభను బంచు మీ భువికి సూరిజనస్తుతవౌచు నిత్య యో

                   గ్యాభయదాతవౌచు నిదె యందుము స్వాగతవాక్సుమాంజలుల్.      15.

 

శ్రీమత్ “శోభకృత్”నామ నూతనసంవత్సర యుగాది సందర్భముగా

అందరికీ హృదయపూర్వక శుభాకాంక్షలు

మీ

హ.వేం.స.నా.మూర్తి,

తెలుగుభాషోపాధ్యాయుడు.

మహిళ

 సీ.

తల్లియై జన్మంబు ధరవారి కొసగుచు

ధన్యత్వమును గాంచు మాన్య మహిళ,

సోదరి తానౌచు నాదరంబును బెంచి 

యాప్యాయతను బంచు నామె మహిళ,

తనయయై సేవించి యనుపమానందంబు

ప్రభవింప జేసెడి పడతి మహిళ,

అర్థాంగియై జన్మ సార్థకంబుగ జేయు

ప్రేమస్వరూపిణి యామె మహిళ

ఆ.వె.

అన్ని దశలలోన నవనిపై జనునకు 

నండయౌచు నిల్చి యతులదీప్తి 

జేర్చి విజయపంక్తి సిద్ధింప జేసెడి 

యామె మహిళ యామె నభినుతింతు.

సీ.మా.

మహిషాసురుని జంపి మహికి గల్యాణంబు 

సమకూర్చి యున్నట్టి శక్తి మహిళ,

నరకాసురునిపైన శరపరంపర బంపి

యంతకు జేర్చిన యామె మహిళ,

దశకంఠు  ఖండించి దానవాళిని ద్రుంచ

గారణ మైనట్టి కాంత మహిళ,

ధరణిపై బలుమార్లు ధర్మంబు నిల్పెడి 

హరికి జన్మదయైన యామె మహిళ,

ముగ్గురు మూర్తులన్ బురిటి బాలల జేసి

బుజ్జగించిన యట్టి పూజ్య మహిళ,

సూర్యోదయము సైత మార్యుని ప్రాణార్థ

మాపి సన్నుతులందు  నామె మహిళ,

యముని తీర్పున గూడ 

క్రమమును దప్పించి 

పతిని జీవితు జేయు వనిత మహిళ

కురువంశ ఖలులను బరిమార్చ హేతువై 

ధర్మంబు గాచిన తన్వి మహిళ,

ఝాన్సీకి రాణియై ఝంఝానిలము రీతి 

నాంగ్లపాలన మడ్డు నామె మహిళ,

కాకతీయుల నేల  నాకతాయుల నెల్ల

యణచి పాలించిన యామె మహిళ,

దీనులపాలిట తాను  తల్లిగ నున్న

కరుణామయి తెరీస కాదె మహిళ

సంస్కర్త్రి, రచయిత్రి, సామాజికోద్ధర్త్రి

యైన దుర్గాబాయి యరయ మహిళ 

వ్యోమగామిగ ఖ్యాతి నొప్పార నార్జించు

కల్పనా చావ్లయు,కనగమహిళ

అలఘుకీర్తిని గాంచు తొలి తెల్గు కవయిత్రి 

తిమ్మక్క రచనలో దిట్ట మహిళ

రమ్యసచ్ఛైలిలో రామాయణంబు తా

నెల్లర కందించు మొల్ల మహిళ

ఆ.వె.

మహిళయొక్కశక్తి  మహిపైన నింతంచు

తెలుప సాధ్యమగునె? పలుకుటగునె? 

ఆమె లేక యున్న నంతయు శూన్యంబె 

యగుట భక్తి నామె కంజలింతు.

కం.

మహితోజ్జ్వలసచ్ఛక్తిగ

మహిపై చేతనము నింపి మనుజుల కిలలో

మహనీయత కలిగించెడి

మహిళకు జేజేలు నిత్యమహిమాన్వితకున్.

2023

 నూతనాంగ్ల సంవత్సరము 2023కు స్వాగతము  

కం.

శ్రీలును శుభములు సుఖములు

మేలగు స్వాస్థ్యంబు జయము మీకందవలెన్

వాలాయముగా హర్షము

లోలిన్ నూత్నాబ్దమందు నుర్వీస్థలిలోన్.  1. 

కం.

ఈవత్సరమం దంతయు

పావన భారతమునందు భాగ్యోన్నతి స

ద్భావైకదీప్తి కూడగ

దైవానుగ్రహముచేత దా నందవలెన్.          2.

కం.

అనుకూల వర్షపాతము

ఘనతర సస్యాభివృద్ధికారక మగుచున్

మనుజాళికి సంతసమును

గొనుడని నూత్నాబ్ద మిలను గూర్చగవలయున్. 3.

కం.

మనసంస్కృతి మనధర్మము

జననుతమయి విశ్వమందు సర్వవిధాలన్

ఘనతర సద్యశ మిచ్చట

ననుదిన మీయబ్దమందు నందించవలెన్. 4.

కం.

గతకాలపు రుగ్మత లీ

క్షితిపయి నశియించి ముదము చేకూరంగా 

నతులిత కార్యస్థైర్యం

బతుకగవలె నరయ నూతనాబ్దంబందున్. 5.

కం.

విద్యార్థుల కందరకును

హృద్యంబగు విజయసిద్ధి యీయబ్దము తా 

నద్యతనశక్తి యేర్పడ

నుద్యోగానందసౌఖ్య మొసగగ వలయున్. 6. 

కం.

గురుజనులకు ఛాత్రులపై

నురుతరవాత్సల్యదీప్తి యొప్పారంగా 

నిరతము శ్రధ్ధాసక్తుల

స్థిరతయు శిష్యులకు నిందు జేకూరవలెన్. 7.

కం.

తమతమ ధర్మంబులపయి

నమలిన సద్భావభాగ్య మమరగ వలయున్

క్రమముగ జనులందర కీ

క్షమపయి నీయబ్దమందు ఘనతరఫణితిన్. 8.

కం. 

మనములలో నిర్మలతయు 

పనులందున సవ్యఫణితి వాక్కులలోనన్

వినయం బీయబ్దంబున

మనుజుల కిట గూడవలయు మాన్యతలందన్. 9.

కం.

సోదరులయి ప్రజలందరు 

నాదరభావంబుతోడ నందరి యెడలన్

మోదముతో వర్తించెడి

భేదము లేనట్టి శక్తి వెలుగొందవలెన్. 10. 

కం. 

ఈయాకాంక్షలతో నే

డీ యాంగ్లాబ్దమున కిప్పు డీయిలయందున్

శ్రేయస్కరమని తలచుచు 

"జే"యంచును స్వాగతింతు సిరు లిట గూడన్. 11. 

కం. 

ఇరవై యిరవై రెండీ 

ధరపయి తనయాత్ర సలిపి తానేగెను ని

న్నిరవై యిరవై మూడును 

సురుచిరగతి స్వాగతింతు శోభలు నింపన్. 12. 

కం.

నీపయి విశ్వాసంబును 

జూపుచు స్వాగతసుమాల సుందరవాక్కుల్

దీపిల్ల బిలుచుచుంటిని

ప్రాపయి రక్షించ నూత్నవర్షమ! రమ్మా. 13.

అందరికి నూతనాంగ్ల సంవత్సరాగమన వేళ హృదయ పూర్వక శుభాకాంక్షలతో 

మీ 

హ.వేం.స.నా.మూర్తి.

స్వాతంత్ర్య అమృత మహోత్సవము

సీ.మా.

శ్రీలకు నిలయమై చిత్కళావాసమై

ప్రఖ్యాతిగాంచిన భవ్య భూమి

వేదశాస్త్రాలలో విస్తృతవిజ్ఞాన

మవనికందించిన యట్టి భూమి

పౌరాణికములౌచు సారవంతములైన

శుభకర్మలకు తీరు చూపు భూమి

సంస్కారమును నేర్పు సంస్కృతీ విభవంబు

బహుళవాత్సల్యాన పంచు భూమి

ధర్మస్వరూపమై నిర్మలానందంబు

కూర్మిజూపుచు గూర్చు కర్మభూమి

మునిజనస్థానమై యనిశంబు పరహిత

మాత్మ నెంచెడి దివ్యమైన భూమి

ఆధ్యాత్మికతతోడ నఖిలప్రపంచాన

భాగ్యమ్ము నిత్యమ్ము పంచు భూమి

పాడిపంటలతోడ పైరుపచ్చలతోడ

కలిమిని విఖ్యాతి గాంచు భూమి

స్వపరభేదములేక భాతృభావంబును

పరులకైనను గోరి పంచు భూమి

తే.గీ.

యగుచు నుతులంది వెలుగొందు నట్టి నాదు

భరతఖండంబు స్వాతంత్ర్య మరసి నేడు

డెబ్బదైదేండ్లు నిండిన వబ్బురంబు

గొలుపు నమృతోత్సవంబున వెలుగుచుండె

భరతమాతకు జేజేలు పలుకరండు

మనత్రివర్ణ పతాకము ననుపమముగ

నెగురజేయగ కదలుడీ జగతిలోన.

శా.

స్వాతంత్ర్యంబున కయ్యె సప్తతిపయిన్ పంచాబ్దముల్ నేడిటన్

చేతోమోదము సంఘటించినది సత్ క్షేత్రంబుగా వెల్గుచున్

ఖ్యాతింగాంచిన భారతావనిపయిన్ గల్యాణభావోన్నతిన్

బ్రీతిన్ సోదరులారరండు సమతన్ విశ్వంబునన్ జాటగన్.

సీ.

శాంతిసౌఖ్యంబుల చల్లని గాలులే

వేళనీ నేలపై వీచవలయు,

నిర్మలానందంబు ధర్మకర్మములందు

నిత్యమీ భువిపైన నిలువవలయు,

హర్షానుభవముల వర్షంబులిచ్చోట

నిరతమ్ము సర్వత్ర గురియవలయు,

స్వపరభేదంబుల ఛాయలీ భూమిపై

నిలువక శీఘ్రమ్ము తొలగవలయు

తే.గీ.

ఇట్టి భాగ్యంబు చేకూర్చ నెల్లవారు

ప్రతిన బూనుడు భారత పౌరులార! 

హర్షదంబైనయ మృతోత్సవాఖ్యపర్వ

మమరె నిచ్చోట స్వాతంత్ర్యమందు నేడు.