దైవలీల

 

దైవలీల

చం. 

జనన మొసంగు, బెంచు, నిల సౌఖ్యములన్ ఘటియింపజేయుచున్

ధనకనకాదిసంపదలు తన్మయతన్ గలిగించు రీతిగా

ననుపమవత్సలత్వమున నందగ జూపుచు మోహమందునన్

జనుని మునుంగ జేయుచును సన్నుతులన్ సమకూర్చి వానితో

ననుదిన హర్షసంతతుల నందగజేయుచు దైవ మన్నియున్

దనవను భావజాలమును దాల్చి నరుండిట సంచరించుటల్

కని వలదంచు దెల్పుటకు గారణ మెద్దియొ చూపి యిచ్చటన్

మనగల కాల మేగెనిక మందుడ పొమ్మని తెల్పి ప్రాణముల్

గొనును, దయాసముద్రుడని, కూర్మిని నిత్యము బంచుచుండి దీ

వెనల నొసంగు వాడనుచు వేదపురాణము లన్ని శాస్త్రముల్

ఘనమగు రీతి బల్కు, శుభకారకుడై వెలుగొందు వాడిటుల్

మనుజునితోడ నీగతిని మాయలు చేయుట లేల? యర్థముల్,

వినుతిని గాంచు బంధములు విస్తృతరీతిని జుట్టనేల? జీ

వనగతభాగ్యసంచయము బాయుచు నొంటరివౌచు మానవా!

చను మననేల? చిత్రమిది, శాశ్వతు డాయత శక్తి మంతుడా

మునిసురవంద్యు డేయెడల మోక్షము నిచ్చునొ, జన్మబంధముల్

కనుమని త్రోయుచుండునొ, యకారణ సౌఖ్యము లంటగట్టునో

గొనకొని యెవ్వ డేగతిని గోరి యెరుంగ సమర్ధుడో యిటన్

మనుజులలోన? దేవగణమాన్యు నఘాపహు గొల్చుచుండి పా

వనమగు జ్ఞానభిక్షనిడ బ్రార్థన జేయుటకన్న నన్యమై

కనదగు మార్గ మొం డెపుడు కానగ రాదు ధరిత్రి లోపలన్.

 

హ.వేం.స.నా.మూర్తి,

29.09.2021.

జయ హనుమ

 జయ హనుమ

మ.

హనుమా! నీదయజూపుమా! ధరణికి ప్డంటెం గదా రుగ్మతల్

గనుమా! వీని విజృంభణంబు జనులన్ గాంక్షించి భక్షించుటల్

వినుమా! మామొర లన్నిరీతుల మహద్భీతిన్ స్వకీయాసువుల్

గొని ముష్టిన్ వసియించుచుండిన స్థితిన్ కూర్మిన్ బ్రసాదించుమా! 1.

శా.

రామస్వామి కనుంగుసేవకుడవై రక్షస్సమాజంబులన్

నీమం బొప్పగ ద్రుంచి యాక్షణమునన్ నీశౌర్య దక్షత్వముల్

క్షేమాకార! యెరుంగ జేసితివి నిన్ సేవించు లోకమ్మునన్

బ్రేమన్ బంచుచు ద్రుంచవేల యిపుడీ వేళన్ గరోనా నిటన్. 2.

శా.

నీ వేస్వామిని గొల్తువో కపివరా! నిత్యమ్ము మే మీయెడన్

దైవం బంచు దలంచి మ్రొక్కెదమయా! తద్రామునిన్ భక్తితో

దేవా! నీవును మేము సోదరులమే దివ్యానురాగమ్ముతో

యీవేళన్ మము గావ వేల హనుమా! యీనిస్తులాపత్స్థితిన్. 3.

మ.

చిరజీవంబును గాంచినాడ వనుచున్ జెప్పంగ విన్నార మీ

ధరపై చేయుచునుండి రామజపమున్ దాదాత్మ్యభావంబుతో

గరుణాత్మా! చరియింతువందు రిచటన్ గ్రౌర్యమ్ము జూపించు నీ

యురుకష్టంబును గాంచ వేల యిపుడీ యున్మాదియౌ భూతమున్. 4.

మ.

హనుమంతా! కరుణారసార్ద్రహృదయా! హర్షప్రదా! శాశ్వతా!

దనుజానీకమదాపహా! ధరసుతాధైర్యప్రభాకారకా!

వనచారీ! జగదేకవీర! యతులప్రహ్లాదభావాన్వితా!

కొనుమీవేళ నమశ్శతంబులు హరీ! క్షుద్రారిసంహారకా! 5.

వాస్తవము

 

వాస్తవము

మ.

ధరపై జన్మము మానవాళికి గనన్ దథ్యంబుగా నెంతయో

స్థిరపుణ్యంబును జేసియుండ గలుగున్ శ్రీమంతమౌ దేవతా

కరుణాసంఘముచేత, నిక్కముగదా! కళ్యాణముల్, హానులున్,

వరసౌఖ్యంబులు నబ్బుచుండు నిచటన్ భాగ్యానుసారంబుగన్                        1.

మ.

జననం బందుట జీవితాశయములన్ సంకల్పమం దుంచుటల్,

ఘనతన్ బొందుట, కామితార్థములకై కార్యంబులన్ సల్పుటల్,

మనగా యత్నము చేయుచుండుటలు, సన్మార్గంబునన్ నిల్చుటల్,

కొనుటల్ మృత్యువు, దైవనిర్ణయములై కూడున్ ధరిత్రీస్థలిన్.                          2. 

ఉ.

నాటకరంగతుల్య మిది నమ్ముడు జీవన, మిందు జీవి కా

మేటి మహత్వదర్శకు డమేయ వసుప్రదుడైన దైవ మే

పాటిగ పాత్రలన్ దెలుపు వానికి కాలము చెల్ల దేహు లీ

దీటగు కాయమున్ విడుట, దీప్తి త్యజించుట సంభవించెడిన్.                        3.

ఉ.

అన్నలు, దమ్ములున్, పడతి, యాత్మజులున్, జనకుల్, స్వకీయులున్,

మన్నన లందజేయుచును మైత్రిని జూపు హితైషి వర్గముల్

క్రన్నన దూరమౌదు రిట గాయము కూలగ, నాదియన్న దే

మున్నను వెంటరా దనుట యొప్పగు వాక్యము లోకమందునన్.                      4.

ఉ.

సత్యము కాదు జీవితము, సౌఖ్యనికాయము, బాంధవత్వముల్

నిత్యము కావు, నష్టమగు, నిక్కము, దీని నెరుంగలేక తా

నత్యతిమోహముం గొని యహర్నిశ లిచ్చట దేహధారి సాం

గత్యము శాశ్వతం బని యకారణ బంధము దాల్చు నీ యిలన్.                        5.  

అద్దె యిల్లు

 అద్దె యిల్లు

చం.

ధరపయి జీవనంబునకు దప్పనివై కనిపించు మూడు సు

స్థిరతను జూపునట్టి వయి దీప్తిని గూర్చెడి కూడు గూడులున్

వరమగు వస్త్రసంచయము వాస్తవ మియ్యది వీని యందునన్

నిరుపమధైర్యసౌఖ్యములు నింపు గృహం బిల మానవాళికిన్.                          1.

చం.

గృహమది స్వర్గతుల్యమయి  క్షేమదమై విలసిల్లు సీమయై

యిహమున సన్నుతుల్ గొనుచు నెల్లవిధంబుల హర్షదాయియై

యహరహ మున్నతంబయిన హాయిని గూర్చుచు నుండి స్వీయమౌ

మహిమను జూపి కాచుగద మానవకోటిని సంతతమ్ముగన్.                           2.

చం.

మనుజున కన్నిరీతులను మాన్యత గూర్చును గేహ, మందుచే

ఘనమగు స్వీయసద్గృహసుఖంబును గాంచగ లేనివారికై

యనుపమమైన వత్సలత నందగ జూపుచు నాదరించు దా

ననుదిన మద్దెయిల్లనుట లక్షరసత్యము లోకమందునన్.                                3.

చం.

తరతమభేద మెంచకయె తన్మయతన్ గలిగించునట్లుగా

నరులు వసించ స్థానమును నైజశుభాశయ మెల్లదెల్పుచున్

ధరపయి నద్దెయిల్లు సుఖదంబయి చూపుచునుండు దీని కెం

దరయగ దుల్య మొక్కటియు  నన్యము లేదిది సత్య మెప్పుడున్.                       4.

ఉ.

దీనులకున్ భయంబు విడ దెల్పుచు రక్షణ చేయునట్టి యా

మౌనిజనస్తుతుండయిన మాధవు భంగిని నద్దెయిల్లు స

న్మానము మధ్యవర్గజుల మానసమందున జూపి కాచుచున్

తానిట నండయై నిలిచి ధైర్యము నింపుచునుండు నిచ్చలున్.                          5.

ఉపాధ్యాయదినోత్సవము

 

కం.    

ఒజ్జల పర్వంబందున 

ముజ్జగములు మేలుకొలిపి ముదమున విద్యల్ 

సజ్జయము శిప్యకోటుల 

పజ్జకు చేర్పించెడి గురువరునకు బ్రణతుల్.

శ్రీకృష్ణాయ నమః

 శ్రీకృష్ణాయ నమః

కం.

శ్రీదేవకీజ! దేవా!

వేదస్తుత! యాదవేశ! విశ్వాధారా! 

మోదప్రాపక! భయహర!

నీదయ నామీద సతము నిలుపుము కృష్ణా!  1.

కం.

భవహర!  యఘనాశంకర! 

స్తవనీయా! వాసుదేవ! శౌరి! మురారీ!

వివిధాసురమదహారీ!

నవనీతప్రియ!  కొనుమయ! నతులివె కృష్ణా! 2.

కం.

విజయసఖా! కంసారీ! 

నిజజనసద్విజయదాత! నిఖిలత్రాతా! 

భజియించెద నిను సతతము 

సుజనోద్ధారక! కరుణను చూపుము కృష్ణా! 3.

కం.

భగవద్గీతాచార్యా!

నిగమాగమశాస్త్రవినుతనిస్తులశౌర్యా ! 

జగదవనామలకార్యా!

తగునార్యా! నతులు గొనుట  దండము కృష్ణా! 4.

నందయశోదానందన!

వందారుజనాఖిలాఘవారక! స్వామీ! 

యెందున్నను నిను దలచెద 

నిందందు ద్వదీయభక్తి నిమ్మయ కృష్ణా! 5.

కం.

లోకంబున నేడంటిన 

చీకాకుల బారద్రోల జేరు మటంచున్ 

నీకొనరించెద వినతులు

చేకొని దయజూపుమయ్య! శీఘ్రమె కృష్ణా! 6.

మందారమూలమందున

సుందర వేణువును దాల్చి శోభిల్లెడి ని 

న్నందములవాని గోపీ

బృందంబులనున్నవాని వేడెద కృష్ణా! 7.

వందనములు కౌస్తుభధర! 

వందనములు యాదవవర! భాగ్యాపారా!

యందుము ధర్మాకారా!

వందనములు దేవదేవ! వరదా!కృష్ణా! 8.