సహోదరులు.

 

సహోదరులు.

 

ఉ.

సోదరసోదరీమణులు శుభ్రగుణాఢ్యులు ధర్మవర్తనుల్

స్వాదువచఃప్రకాశితులు సన్నుతభావులు నన్ను జూచి య

త్యాదరలీల బల్కెదరు తమ్ముడ! రమ్మని, వారి కేయెడన్

మోదము గూర్చుమా యనుచు మ్రొక్కెద నాజగదేకరక్షకున్.  1.

 

ఉ.

అందరిలో కనిష్ఠునిగ నౌటను జీరుచు వార లెల్లరున్

సుందరచిత్తశోభితులు సూనృతవర్తను లన్నిచోట్ల నా

నందము నాకు బంచుచును నాపయి బ్రేమను జూపుచుందు రా

వందన కర్హులై వెలుగు వారల నగ్రజులన్ నుతించెదన్.  2.

 

మ.

ఇది యీరీతిగనుండు దీనినిట నీవీరీతి జేయం దగున్

పదిలం బోయి విధంబు నేర్చి మనుమా భాగ్యంబులం గాంచుమా

ముద మేవేళల నందు మంచు ననుజన్ము న్నన్ను వాత్సల్యసం

పదతో నింపెడి యగ్రజాళికి నతుల్ వాంఛించి యర్పించెదన్. 3.

 

ఉ.

కంటికి రెప్పవోలె నను   గాచుచు నుందురు వీరలిందు నా

యింటికి నొంటికిన్ గలుష మింతయు జేరనిరీతి, నీకు మే

ముంటిమి భీతిచెంద కెపు డున్నత భావము లంది యుండ ని

న్నంటగ రాదు దుఃఖమని యంచును బ్రేమను జూపి నిచ్చలున్.  4.

 

ఉ.

అందరి కంటె పిన్నయయి యన్నిట దీవెన లందుచుండుటం

దందము, హాయి తృప్తియును హర్షము లిట్లని చెప్పనౌనె యీ

చందము లంద నీభువిని సాధ్యమె యందరి కార్యులార! నా

కందుట భాగ్య మంచనెద,  నగ్రజులన్ స్తుతియించుచున్ మదిన్. 5.

 

హ.వేం.స.నా.మూర్తి.

24.9.20.