శ్రీ శు భ కృత్ నా మ సం వ త్స ర ము న కు స్వా గ త ము

 

శ్రీ శు భ కృత్ నా మ సం వ త్స ర ము న కు స్వా గ త ము

శా.    శ్రీమంతంబయి సౌఖ్యదాయకముగా చిద్భావమున్ నింపుచున్

క్షేమాకారము దాల్చి వత్సలతతో శ్రీలన్ బ్రసారించుచున్

బ్రేమన్ బంచుచు స్వీయ యానమున సద్విశ్వాసమున్ బొందుచున్

నామౌన్నత్యము గాంచె తాను "శుభకృ"న్నామాబ్ద మన్నింటిలోన్.             1.

మ.    "శుభకృ"న్నామక భవ్యవత్సరమిటన్ శుద్ధానురాగమ్ముతో

విభవంబుల్ ధరవారి కెల్లగతులన్ విస్తారరూపంబుగా

బ్రభవించం దగు సవ్యమార్గగతులన్ బ్రహ్మాండభాండంబునం

దభయం బంచు ఘటింప జేయునదియై యందెన్ సువిఖ్యాతులన్.                 2.

చం.   భరతమహీస్థలంబుపయి భవ్యములై వెలుగొందు పద్ధతుల్

సురుచిరభావదీప్తియుత సుందరకర్మము లాచరించు స

ద్వరగుణసంచయంబులను దాను ఘటింపగ జేయునంచు శ్రీ

కర"శుభకృత్తు"పొందినది ఖ్యాతి యనంతము గాగ పూర్వమున్.            3.

శా.    కృత్యంబుల్ మనుజాళి కేయెడల వక్రీభూతదుస్సత్వముల్

నిత్యంబున్ గలిగింప జేయని గతిన్ నిష్ఠామహత్వంబుతో

వ్యత్యాసంబును జూపకుండ "శుభకృ"ద్వర్షంబు హర్షస్థితిన్

బ్రత్యక్షం బొనరించ గల్గు క్రమతన్ వాసిన్ గనెన్ ధాత్రిలోన్.                   4.

శా.    నానాసస్యసమృద్ధి యన్నియెడలన్ నవ్యోరుసత్వంబుతో

నీనేలన్ బ్రభవింపజేయుటకునై యింపారు భావంబుతో

దానిచ్చోటకు వచ్చుచుండు "శుభకృ"ద్భవ్యాబ్ద ముత్సాహియై

దీనోద్ధారక విష్ణుతుల్య యగుచున్ దివ్యప్రకాశమ్ముతోన్.                              5.

మ.    మహినీరీతి యశంబు గాంచు "శుభకృ"న్మాన్యాబ్ద మాత్మీయస

న్మహనీయత్వము జూపి సౌఖ్యచయ సమ్పచ్ఛక్తులన్ నింపి తా

నిహమం దాయత హర్షము న్నిలుపగా నేతెంచె, సద్భావనా

సహితా! స్వాగత మబ్దరాజమ! శుభస్వాంతా! జగద్వ్యాపకా!                    6.

ఉ.     సంతతధర్మదీక్షయు, బ్రశస్త వినిర్మలభావజాల మ

త్యంత మృదూక్తిభాషణ మహర్నిశ లొప్పగు సత్యనిష్ఠ యా

శాంతవిశాలసద్యశము, సన్నుతవర్తన నుండు శక్తి స

త్వాంతరసిద్ధియున్ "శుభకృ"దబ్దమ! చూపుము మానవాళికిన్.                      7.

ఉ.     వత్సరకాల మంతయును వైభవవృద్ధిపరంపరాస్థితుల్

సత్సుఖసంపదల్, జనుల స్వాంతములందున సాధుభావముల్,

కుత్సిత మింతలేమియు, నకుంఠిత సుస్థిరకార్యదీక్ష లో

వత్సలతారసార్ద్ర! నవవర్షమ! యీభువి కందగావలెన్.                          8.

చం.   సభలను మారుమ్రోగవలె సజ్జనసంస్తుతి శోభనంబుగా

నభయము గూడుచున్ "శుభకృ"దబ్దమ! నీవిట జేరియుండగా

శుభము ఘటించుచుండవలె శుభ్రయశోవిభవప్రభావముల్

ప్రభలను జిమ్ముచుండవలె భాగ్యచయంబది యందుచుండగన్.                     9.

చం.   రవిశశితారకాచయము రమ్యతనింపుచునుండ నెల్లెడన్

భువిపయి సస్యసంపద కపూర్వబలంబును గూర్చు రీతిగా

నవిరళవర్షముల్ "శుభకృ"దబ్దమ! నీ కనుసన్నలోన సం

స్తవముల కర్హతం గొనుచు సవ్యవిధంబున నందగావలెన్.                    10.

చం.   ముదుసలివారలై బలము పూర్తిగ తగ్గి చరించలేమిచే

ముదమును గాంచనట్టి తనపూర్వుల చిత్తము సంతసించగా

సదమలభావుడై జనుడు సన్నుతరీతిని సేవచేయు టీ

యదనున గాంచ నో "శుభకృ"దబ్దమ! భాగ్యము కల్గజేయుమా!                      11.

ఉ.     నమ్మకముంచి నీపయిని నైష్ఠికతన్ గొని స్వాగతించు మా

కమ్మవు నయ్యవై "శుభకృ"దబ్దమ! హాయిని గూర్తువో యిటన్

గ్రమ్మిన వ్యాధిగూల్చి, గతకాలమె మేలని మానవాళి స్వాం

తమ్ములలోన దల్చువిధి దావక వర్తన మిందు జూపెదో?                              12

చం.   కువలయమందు నేడు గన కుత్సితభావము మత్సరంబులే

స్తవముల నందుచున్నయవి తద్గత చిత్తము లాశ్రయించు నా

యవగుణ రాజినిన్ శుభకృదబ్దమ! నీ కుశలత్వ దీప్తిచే

జవమున దున్గగా వలయు సద్విధి జూపగ స్వాగతించెదన్.                   13.

శా.    స్వాముల్ తామని చిత్తదీప్తి కొరకై సన్న్యాసు లైయుండి సత్

క్షేమం బందరి కందయోగ్యమగు సుశ్రీయుక్త వాక్యస్థితిన్

బ్రేమన్ బంచగలేని వారల మదిన్ విజ్ఞత్వమున్ నింపి త్వ

త్సామర్ధ్యంబును జూపుమోయి! “శుభకృ”ద్వర్షంబ” నీ వేళలోన్.                     14.

మ.    గతవర్షంబులలోన నీ జగతిలో క్రౌర్యైక చిత్తంబుతో

నతులార్తిన్ గలిగించ జేరినది నవ్యంబైన రోగంబు త

ద్దితిజాకార కరోన కెల్లగతులన్ దేజంబునుం గూల్చి నీ

వ్రతదీక్షన్ బ్రకటించుమోయి  “శుభకృ” ద్వర్షంబ!  సత్వంబునన్.                    15.

మ.    తరుణం బియ్యది యీ సమాజమునకున్ ద్వచ్చిత్తనైర్మల్యమున్

బరమానందము గూర్చ జూపుటకునై భద్రాశయ స్ఫూర్తితో

ధరకేతెంచితి వీవటందు “శుభకృ”ద్వర్షంబ! నిన్నియ్యెడన్

వరశబ్దంబుల స్వాగతించెదను  భవ్యశ్రేష్ఠ భాగ్యప్రదా!                          16.

శా.    మున్నే పూజలు చేసి యుంటినొ మహా మోదంబు నందంగనౌ

త్వన్నామంబును, రూపమిందు శుభకృ ద్వర్షంబ నేగాంచితిన్

నిన్నీధాత్రికి స్వాగతించితి నిటన్ నిత్యానురాగమ్ముతో

నెన్నం జాలిన పద్ధతిన్ నిలువుమా! ఈ వత్సరం బంతయున్.                         17.

 

అందరికీ శ్రీ శుభకృన్నామ సంవత్సర శుభాకాంక్షలు.

హ. వేం. స. నా. మూర్తి.