Friday 29 June 2012

పేదవాడు

ది. 29.06.2012 వ తేదీ  
"శంకరాభరణం" బ్లాగులో  
"పద్యరచన" శీర్షికన ఇవ్వబడిన చిత్రానికి 
వ్రాసిన పద్యవ్యాఖ్య

పేదవాడు
 సీ.
కట్ట బట్టలు లేవు కరువయ్యె మెతుకులు
          పలుకాలకించెడి వారు లేరు,
రోజున కొకటిగా రుగ్మతల్ వ్యాపించె
          బ్రతికియుండుటె నేడు భారమయ్యె,
దీనబాంధవుడైన దేవాధిదేవుడే
          పాషాణరూపియై పలుకనపుడు
సాటివారలమంచు జగతిలో నడయాడు
          శ్రీమంతులనుగూర్చి చెప్పనేల?
ఆ.వె.
జన్మ మంది నాడ జనులంద రేరీతి
పుట్టి యుండి రట్లె పుడమిమీద
తిండి బట్ట లేక తిరుగుచు నుండెడి
పేదవాని నగుట కేది కతము?
ఆ.వె.
పూర్వజన్మమందు పుణ్యంబు చేయనో?
సంచరించ లేదొ సవ్యగతిని?
తెలియకుండె చెప్పవలయును దేవుడే
పేదవాని నగుట కేది కతము?
ఆ.వె.
సుఖములేక సతము సూర్యోదయాదిగా
గుడులు, వీధులందు, బడులవద్ద
చేరి దాన మింత చేయుడన్ననుగాని
దుడ్డు కొంచెమైన దొరకదయ్యె.
ఆ.వె.
భవమునొసగునట్టి భగవానుడే రక్ష
యందు రెందుఁ బోయె నాఘనుండు
బాధ లిట్లు గూర్చు, భవబంధ మోచనం
బీయ రాడదేమి? ఈశ్వరుండు.
ఆ.వె.
అనుచు మనసులోన నత్యంతవేదన
నందు పేదవారి ననవరతము
నిర్మలాత్ములౌచు, నిస్స్వార్థచిత్తులై
చేరి సాయ మంద జేయ వలయు.
ఆ.వె.
సాటివారి కింత సాయంబు చేయుటే
ధరణిలోన గొప్ప ధర్మ మికను
మంచి మనసుతోడ మానవసేవయే
మాన్యమైన పూజ మాధవునకు.

No comments:

Post a Comment