"నేను వర్తమానాన్ని
ప్రేమిస్తాను"
చం.
నిజమిది "వర్తమానమును నిర్మలచిత్తముతోడ నెంచెదన్"
విజయము లందజేయుచును
విజ్ఞత నేర్పెడి సాధనమ్ముగా,
స్వజనహితైషిసత్తముల
సంగతి జూపుచు భావినందు నా
రుజలను దుష్టశక్తుల
నిరోధక భావము గూర్చు దానిగన్. 1.
చం.
గతము తొలంగి పోయినది
కామితముల్ సమకూర్చకుండ, తా
నతులితమైన వేగమున
నట్టులె భావియు దాటిపోవునో,
చతురతజూపునో, తెలియజాలునె?
తానిట చేరకుండగన్
క్షితిపయి జీవనం
బుడుగ జేయునొ? దుఃఖము లందు నెట్టునో? 2.
చం.
అరయగ భావియున్ గతము
లన్నిట దూరము లౌట నిచ్చటన్
సురుచిర సౌఖ్యజాలముల
చొప్పును జూపెడి వర్తమానమున్
స్థిరమగు భావముం
గొనుచు జేర్చెద బ్రేమముతోడ చిత్తమం
దురుతర హర్షసంపదల
నున్నతలీలను గాంచ బూనుచున్. 3.
చం.
ఇదియగు సత్యకాల
మిదియే కనిపించును స్పష్టమౌవిధిన్
ముదమును గూర్చు
నియ్యదియె మోహనమౌ ఘనదీప్తి జీవికిన్
సదమలమై వెలుంగుచును
జక్కగ జూపుచునుండు గాన నే
నిదె యిట వర్తమానమున
నిమ్ముగ బ్రేమము బూని యుండెదన్. 4.
చం.
అనిశము వర్తమానమున
నాస్థను బూని చరించుచుండెదన్
ఘనతరభావికాలశుభకార్యములందున యోగ్యమైన భా
వనలను జేర్చి చిత్తమున
భాగ్యచయంబుల నందునట్లు జీ
వనమున మార్గదర్శనము
వైభవమొప్పగ జేయుచుండుటన్. 5.
చం.
మనుజుడ నౌట కన్నులకు
మాన్యతగూర్చుచు గానిపించి జీ
వనమున కైనసత్త్వము
నవారితరీతిని నింపునట్టిదౌ
ఘనమగు వర్తమానమున గాంక్షలు దీరగ బ్రేమ జూపెదన్
మనగల శక్తినిం గనెద
మంచిని బెంచెద లోకమందునన్. 6.
చం.
బహువిధకార్యసంతతినపారఫలంబిడు
భూతకాలమున్,
‘సహనముతోడనుండ గడు చక్కని సౌఖ్యము లందజేతు మీ
కిహమున’ నంచు బల్కుచు జయిష్ణుత నింపెడి భావికాలమున్
మహిమను గల్పు కాలమిది
మంచిని నేర్పును గారవించెదన్. 7.
చం.
సురుచిరమైన కాల
మతిసుందర మన్నిట వర్తమానమే
నిరుపమ మస్మదీయమయి
నిత్యము కన్నులముందు సాగుచున్
ధరపయి నుండగల్గుటకు
దారిని జూపెడిదౌట దీనినిన్
కరమిట గారవించెద
సుఖంబుల నందుచు బ్రేమ జూపెదన్. 8.
హ.వేం.స.నా.మూర్తి.
01.09.2019.
No comments:
Post a Comment