ఇది కదా నిజమైన అందం.

ఇది కదా నిజమైన అందం.

కం.

శ్రీకరమగు యత్నంబును

ప్రాకటముగ నందియుండి బహుకార్యములన్

జేకొని జనహిత మిందని

యేకాలము జేయు టెల్ల యిందందమగున్.                                       ౧.

చం.

సదమలమైన చిత్తమున సన్నుతరీతిని సాధుభావ సం

పదలను నింపి సంతతశుభంబులు జీవనమందునందగా

నదనున జాగృతిం గనుట యన్నివిధంబుల యోగ్యకార్యమౌ

నిదియె కదా మనుష్యునకు నిచ్చట నందము గూర్చు నెన్నడున్.          ౨.

ఉ.

సంతతమీధరాస్థలిని సర్వజనంబుల కన్నిరీతులన్

సంతస మందుచుండవలె, సౌఖ్యము గూడుచు జీవనంబునన్

దంతట నిండుచుండవలె నద్భుత సద్విజయంబులంచు తా

నెంతయు బ్రీతి నెంచుటయె యిచ్చట నందము గూర్చు నెన్నడున్.      3.

మ.

తనకన్నింటను సౌఖ్య మందుటకునై ధర్మంబునున్ వీడి నూ

తనమార్గంబులు వంచనార్థ మిచటన్ తానందగా జూచుచున్

మనుజుండిందు జరించకుండ హృదిలో మాలిన్యమున్  వీడుటం

దనుమానం బొకయింతలేదు  సొగ సత్యంతంబు సంధిల్లెడిన్.               4.  

శా.

నీనాభేదము లెంచకుండ శుచియై నిత్యంబు లోకంబునన్

వానిన్ వీనిని నాత్మతుల్యులనుగా భావించి కల్యాణ మిం

దేనాడైనను సర్వమానవులకై యెప్పట్టునన్ గోరుచున్

దానన్ సంతస మందుచుండటయె యందంబన్న సత్యంబగున్.           5.

సీ.

తనకు జన్మంబిచ్చు తల్లిదండ్రులయందు

………………………….దయగల్గియుండుట, ధరణిలోన

దీనులై చరియించు మానవాళినిజేరి

………………………….యండయై నిలబడి యుండుటయును,

స్వార్థమ్ము విడనాడి జన్మమందలి మర్మ

………………………….మాత్మలో సంతత మరయుటయును

జన్మభూమికి రక్ష సద్భక్తుడై చేయ

………………………….సంసిద్ధుడై యుండి సాగుటయును

తే.గీ.

భువిని జన్మించి యున్నట్టి పురుషున కిట

సమ్యగానంద సంధాయి సత్వదాయి

యగును సత్యమ్ము సందియ మందనేల

యదియె యందమ్ము నిర్మల హృదయులార.                          6.