సమర శతకము

తప్పక సమరమును జేయదగును.

(సమర మెల్లగతుల సలుప దగును).

సమర శతకము

ఆ.వె.

శ్రీల నందగోరి మేలైన సౌఖ్యముల్

పడయుచుండి సతము వసుధపైన

తిరుగదలచువాడు నిరత ముద్యోగియై

సమర మెల్లగతుల సలుప దగును.                           1.

ఆ.వె.

జీవనంబు నందు దైవత్వమును గాంచి

దుష్టభావనమును ద్రోయ దలచు

వాడు నిత్య మిచట బహుయత్నయుక్తుడై

సమర మెల్లగతుల సలుప దగును                            2.

ఆ.వె.

ధర్మకార్యమందు ధన్యత్వమును గాంచ

దలచువాడు భువిని దనుజులపయి

దీక్షబూని స్వీయ తేజంబు చూపించి

సమర మెల్లగతుల సలుప దగును                            3.

ఆ.వె.

సత్యనిష్ఠతోడ సర్వత్ర చరియించు

చుండి విజ్ఞు డౌచు నుండగోరు

వాడు బొంకులాడు వారితో సర్వదా

సమర మెల్లగతుల సలుప దగును.                           4.

ఆ.వె.

దేశమందు భక్తి దివ్యమౌ ధీశక్తి

కలిగియుండు వాడు పలువలందు

సన్నుతించురీతి సత్వంబు జూపించి

సమర మెల్లగతుల సలుప దగును.                           5.

ఆ.వె.

దీనజనులయందు దివ్యత్వముం జూడ

దలచి దీక్షబూని మెలగువాడు

మనసులోన జేరు దనుజభావంబుతో

సమర మెల్లగతుల సలుప దగును.                           6.

ఆ.వె.

సకలజనులలోన సర్వేశ్వరుని జూడ

నుత్సహించి మనుచు నుండువాడు

విస్తృతముగ జేరు విఘ్నసంతతితోడ

సమర మెల్లగతుల సలుప దగును.                           7.

ఆ.వె.

శక్తి జూపుచుండి సమసమాజమునందు

హాని గూర్చునట్టి యసురభావ

ములను ద్రుంచు కొరకు ఖలులపై విజ్ఞుండు

సమర మెల్లగతుల సలుప దగును.                           8.

ఆ.వె.

స్వార్థబుద్ధితోడ సంఘంబునకు గీడు

కలుగ జేయుచుండు కఠినులందు

కరుణ పనికిరాదు నిరతంబు మనుజుండు

సమర మెల్లగతుల సలుప దగును.                           9.

ఆ.వె.

అనయ మిచట జేరి ఘనపిశాచము లట్లు

కరుణ లేక  నరుని జెరచుచుండు

దుఃఖ మందజేయు దుర్నీతులను ద్రుంచ

సమర మెల్లగతుల సలుప దగును.                           10.

ఆ.వె.

బలము గలుగువాడు బలహీనులను జేరి

మానధనములన్ని దానవుడయి

యపహరించుచుండ నవ్వాని నణచంగ

సమర మెల్లగతుల సలుప దగును.                           11.

ఆ.వె.

పాలకుండు నౌచు బహుభంగులను దేశ

హితము గోరకుండ నతులమైన

స్వార్థబుద్ధితోడ సంచరించుచునుండ

సమర మెల్లగతుల సలుప దగును.                           12.

ఆ.వె.

సాధువర్తనాన జగతికి గల్యాణ

మంద జేయువారి కనుపమ మగు

కష్ట మొదవజేయు కఠినాత్ములను జీరి

సమర మెల్లగతుల సలుప దగును.                           13.

ఆ.వె.

సన్నుతించదగిన సన్మార్గములయందు

సంచరించువాని సత్త్వములకు

బాధ కూర్చునట్టి పాపులపై నిత్య

సమర మెల్లగతుల సలుప దగును.                           14.

ఆ.వె.

సద్యశంబు లంది సర్వకాలములందు

జగతిలోన నిలువ దగిన రీతి

నుండ దలచువార లొప్పార నఘముపై

సమర మెల్లగతుల సలుప దగును.                           15.

ఆ.వె.

స్వీయధర్మ మొసగు శ్రేయంబులని నమ్మి

తద్గతాస్థ గలుగు ధైర్యశాలి

నిద్రబోక సతము తద్రక్షణార్థమై

సమర మెల్లగతుల సలుప దగును.                           16.

ఆ.వె.

భువిని జీవనంబు బుద్బుదప్రాయంబు

కనుక యాలసించ కనుదిన మిట

మంచిపనులు చేయ మనవలె, చెడుగుపై

సమర మెల్లగతుల సలుప దగును.                           17.

ఆ.వె.

వసుధలోన నిచట వర్తమానమునందు

ప్రగతి నడ్డగించి బహుళమైన

యఘము గూర్చుచున్న యవినీతిపై గోరి

సమర మెల్లగతుల సలుప దగును.                           18.

ఆ.వె.

కవిత వ్రాయగలిగి కవియౌచు వెలుగొందు

విజ్ఞవరుడు నేడు విశ్వమందు

నలమి యుండినట్టి కలుషజాలంబుపై

సమర మెల్లగతుల సలుప దగును.                           19.

ఆ.వె.

ఒరుల నేమి యనక యుత్తముం డనురీతి

మసలుచుండువాని మనమునకును

బాధ గలుగజేయు పాపాత్ము నణచంగ

సమర మెల్లగతుల సలుప దగును.                           20.

ఆ.వె.

సంఘమందు నేటి సామాన్య జనులకు

నందకుండ ధరలు నాకసమున

జేరుచుండ నిచటి వారలు దీక్షతో

సమర మెల్లగతుల సలుప దగును.                           21.

ఆ.వె.

రాజకీయ మనుచు రావణభావాలు

రుద్దుచుండు వారి పెద్దరికము

నణచ బూని పౌరు డత్యంత శక్తితో

సమర మెల్లగతుల సలుప దగును.                           22.

ఆ.వె.

సేవలంది యుండి జీవనంబున కైన

భృతిని జూపకుండ నతులకష్ట

మొసగు వానిపైన నసదృశసత్త్వాన

సమర మెల్లగతుల సలుప దగును.                           23.

ఆ.వె.

అవనిలోన నున్న యంధవిశ్వాసాల

యునికి గూలద్రోసి యుత్సవంబు

లిచట జేయగోర నెంతేని దీక్షతో

సమర మెల్లగతుల సలుప దగును.                           24.

ఆ.వె.

తోరమౌచునున్న దుష్కృత్యములకిందు

నునికి నణచివేసి యనుపమమగు

హాయి నిలకు నిత్య మందించ దలచిన

సమర మెల్లగతుల సలుప దగును.                           25.

ఆ.వె.

మున్ను తాను చేసి యున్నవాగ్దానాల

నొక్కటైన గాని యొప్పు మీర

తీర్చనట్టి నేత తీవర మణచంగ

సమర మెల్లగతుల సలుప దగును.                           26.

ఆ.వె.

వీరు వారటన్న భేదభావంబులు

మదిని జేరకుండ మమత యందు

కొరకు చిత్తమందు నిరతంబు సరియైన

సమర మెల్లగతుల సలుప దగును.                           27.

ఆ.వె.

చేవ గలిగి యుండు భావగర్భితమైన

పద్యరచన చేయ వలయునన్న

యతులు ప్రాసలందు నతులితం బగురీతి

సమర మెల్లగతుల సలుప దగును.                           28.

ఆ.వె.

అతులశక్తి బూని యన్యాయమును ద్రుంచి

న్యాయవర్ధనంబు చేయబూను

వాడు వెరవకుండ బహుళాఘపంక్తితో

సమర మెల్లగతుల సలుప దగును.                           29.

ఆ.వె.

సజ్జనుం డటంచు సర్వకాలములందు

ఖ్యాతి నందగోరు ఘనున కిచట

నతులమైన పీడ నందించు వారితో

సమర మెల్లగతుల సలుప దగును.                           30.

ఆ.వె.

దివ్యదేహు డౌచు దీపిల్లవలెగాని

యంధకారమందు నణగి మనుజు

డుండరాదు దాని కొప్పిదం బగురీతి

సమర మెల్లగతుల సలుప దగును.                                   31.

ఆ.వె.

వెరపు గూర్చ బూని సరిహద్దులను దాటు

వారి నణచ జనుడు ధీరు డగుచు

నిలిచియుండ వలయు తలచి యవ్వారితో

సమర మెల్లగతుల సలుప దగును.                                   32.

ఆ.వె.

యోగ్యమైన దివ్యభాగ్యంబులను గూర్చు

భారతీయవేద పరిమళముల

నతకరించువారి నణచంగ సతతంబు

సమర మెల్లగతుల సలుప దగును.                                   33.

ఆ.వె.

పలురకంబులైన కులమతభేదాలు

నేర్పుచుండు ఖలుల నిస్తులమగు

సత్వ మణచ జనుడు సర్వసన్నద్ధుడై

సమర మెల్లగతుల సలుప దగును.                                   34.

ఆ.వె.

జనుడు సంతసాన తన లక్ష్యమును జేర

గోరుచుండ వాని జేరనీక

యడ్డగించు వాని నణచెడి కార్యాన

సమర మెల్లగతుల సలుప దగును.                                   35.

ఆ.వె.

అంతరంగమందు ననిశంబు వసియించి

చెరుపు గూర్చు నట్టి యరుల నణగ

ద్రొక్క బూని జనుడు తోరంపు దీక్షతో

సమర మెల్లగతుల సలుప దగును.                                   36.

ఆ.వె.

సమసమాజమందు సామాన్య జనులను

బ్రతుకనీయకుండ బహుళగతుల

బాధపెట్టుచుండు పాపాత్ములను గాంచ

సమర మెల్లగతుల సలుప దగును.                                   37.

ఆ.వె.

తానె పండితుండ తనకంటె నధికుండు

లేడటంచు జగతి నాడ నీడ

మచ్చరించువాని మదమును ద్రుంచంగ

సమర మెల్లగతుల సలుప దగును.                                   38.

ఆ.వె.

దేశభవితకొరకు లేశమైనను గొంకు

లేక "చెరుపుగూర్చు మూకలపయి"

యుత్సహించి దూకు టొప్పౌను వారితో

సమర మెల్లగతుల సలుప దగును.                                   39.

ఆ.వె.

క్షితికి తిండి బెట్టి యతులిత సౌఖ్యంబు

గూర్చుచుండు రైతు కోరికలను

నమిత శక్తి జూపి యణచెడి వారిపై

సమర మెల్లగతుల సలుప దగును.                                   40.

ఆ.వె.

లోపములను జూపి వాపోవు రీతిగ

సాటిజనులనుండి సంపదలను

గుంజునట్టి నేటి ఘోరకృత్యములందు

సమర మెల్లగతుల సలుప దగును.                                   41.

ఆ.వె.

అఖిల జగతిలోన నాధారమైనట్టి

యతివ కాదరంబు నందజేయ

జనుడు సంతతంబు సరియైన మార్గాన

సమర మెల్లగతుల సలుప దగును.                                   42.

ఆ.వె.

ప్రతిభ జూడకుండ పట్టంబులను గట్టు

యత్నములను ద్రుంచ నూత్నమైన

శక్తినంది వారి సత్వంబు లణగంగ

సమర మెల్లగతుల సలుప దగును.                                   43.

ఆ.వె.

బాల్యమందు విద్య బడయంగ దగియుండ

నట్టివారి నెప్పు డతులమైన

శ్రమకు  ద్రోయునట్టి క్రమమును మాన్పంగ

సమర మెల్లగతుల సలుప దగును.                                   44.

ఆ.వె.

మునిజనంబు లిచట ముందు జూపినయట్టి

సవ్యమార్గమందు సాగుకొరకు

దైవశక్తి నంది యావశ్యకంబైన

సమర మెల్లగతుల సలుప దగును.                                   45.

ఆ.వె.

మదుల నుబ్బురీతి సదమల జలములు

ముదముతోడ నొసగు నదులయందు

గలుపుచుండునట్టి కాలుష్యముల నాప

సమర మెల్లగతుల సలుప దగును.                                   46.

ఆ.వె.

నీది నాది యనెడి భేదభావంబుతో

జగతిలోన ద్వేష మగణితముగ

బెంచు భావనలను ద్రుంచంగ వలసిన

సమర మెల్లగతుల సలుప దగును.                                   47.

ఆ.వె.

విమలురై వెలుంగు విజ్ఞసత్తములందు

హద్దుమీరి పలుక ననవరతము

చూచుచుండువారి చొప్పడగించంగ

సమర మెల్లగతుల సలుప దగును.                                   48.

ఆ.వె.

దుర్మదాంధులౌచు కర్మంబు లన్నింట

దైత్యభావ మొదవ దడయకుండ

ముందు కేగ జూచు మూర్ఖుల నాపంగ

సమర మెల్లగతుల సలుప దగును.                                   49.

ఆ.వె.

ఆశతోడ రేగి దేశభాగ్యాలతో

నాటలాడుచుండి యనవరతము

తిరుగు చెనటులందు గరువంబులను ద్రుంచ

సమర మెల్లగతుల సలుప దగును.                                  50.

ఆ.వె.

సందియంబు లేదు సర్వకార్యములందు

ప్రజల హితము గోరి పాటు పడెడి

భావములను జెరచు వారితో నెటులైన

సమర మెల్లగతుల సలుప దగును.                                   51.

ఆ.వె.

బుద్ధిహీనులౌచు పోరాటము లటంచు

సంఘమందు నున్న సంపదలను

నష్టపరచుచుండు దుష్టుల నాపంగ

సమర మెల్లగతుల సలుప దగును.                                   52.

ఆ.వె.

విశ్వవీధిలోన విస్తృతంబగురీతి

ఖ్యాతి నందు భరతజాతి కార్తి

కలుగజేయు వారి తలపులు ద్రుంచంగ

సమర మెల్లగతుల సలుప దగును.                                   53.

ఆ.వె.

జనులలోన నుండు జవసత్వముల నెల్ల

జంపురీతి వస్తుచయమునందు

కల్మషములు నింపు క్రమమును ఖండించ

సమర మెల్లగతుల సలుప దగును.                                   54.

ఆ.వె.

నాకతుల్య మౌచు నైకమత్యపుదీప్తి

పొందియున్న భరతభూమిలోన

కలహములను బెంచు తలపులు ఖండించ

సమర మెల్లగతుల సలుప దగును.                                   55.

ఆ.వె.

పేదజనులయందు మోదంబు గలిగించు

నట్లు నేత లంద రనవరతము

మెలగునట్లు వారి తలపులు మార్చంగ

సమర మెల్లగతుల సలుప దగును.                                   56.

ఆ.వె.

మాతృభాషయందు మమతానురాగాలు

కలిగి యగ్రమందు నిలుప బూను

వారియందు సుఖము చేరుట కనువైన

సమర మెల్లగతుల సలుప దగును.                                   57.

ఆ.వె.

పరుల సుఖము గోరి నిరతంబు శ్రమియించు

సజ్జనాళి చేయు సవనమందు

నడ్డుపడెడివారి యత్నంబులను గూల్చ

సమర మెల్లగతుల సలుప దగును.                                   58.

ఆ.వె.

నాస్తికత్వమిచట నాస్తిగ భావించి

విశ్వసించువారి విషయమందు

కంటకంబు లట్టు లంటు వ్యాధులపైన

సమర మెల్లగతుల సలుప దగును.                                   59.

ఆ.వె.

నేడు సంఘమందు పీడించుచున్నట్టి

మూఢభావతతుల మొదలు నరుక

బూను యత్నమందు కానైనరీతిలో

సమర మెల్లగతుల సలుప దగును.                                   60.

ఆ.వె.

బ్రతుకు తెరువటంచు బహుపద్ధతులలోన

సత్యదూరు లౌచు నిత్య మిచట

నటన జేయువారి నాటకంబుల నాప

సమర మెల్లగతుల సలుప దగును.                                   61.

ఆ.వె.

తల్లిదండ్రులందు, తనవారియందును,

సాటిజనులయందు సర్వమందు

దయను జూపువారి కయుతసత్వము గూర్చ

సమర మెల్లగతుల సలుప దగును.                                   62.

ఆ.వె.

మంచి మాటలాడి వంచించగా బూని

మిత్రకోటి కార్తి మిగుల గూర్చు

వారి నణచుకొరకు వలసిన రీతిలో

సమర మెల్లగతుల సలుప దగును.                                   63.

ఆ.వె.

మనుజు డౌట నిచట జననంబు నందుట

పూర్వజన్మలోని పుణ్యఫలము

కాన నగ్రగామి కాగోరి యుక్తమౌ

సమర మెల్లగతుల సలుప దగును.                                   64.

ఆ.వె.

నేత యౌచు జేరి జాతికి సరియైన

యండ యగుచు నిలిచి యుండనట్టి

వాని కెట్టులైన వాస్తవంబును నేర్ప

సమర మెల్లగతుల సలుప దగును.                                   65.

ఆ.వె.

చదువులందు మిగుల సత్వంబులను గాంచి

విజ్ఞు లౌచు నిచట వెలుగగోరు

వారు మార్గమందు బహుకష్టపంక్తితో

సమర మెల్లగతుల సలుప దగును.                                   66.

ఆ.వె.

ఆత్మశుద్ధి లేక యాచారమున బోక

హితుడుగాక జగతి కతులితమగు

హాని గలుగజేయు వానిని దండించ

సమర మెల్లగతుల సలుప దగును.                                   67.

ఆ.వె.

భరతభూమిలోని స్థిరతర సంపత్తి

యైన భారతాదులందు నున్న

వాని నొప్పనట్టి భావంబులను మార్చ

సమర మెల్లగతుల సలుప దగును.                                   68.

ఆ.వె.

నాది నా కటంచు నవ్యప్రయత్నంబు

స్వీయసుఖము గోరి చేయునట్టి

భావ మాత్మలోన చేవ జూపనిరీతి

సమర మెల్లగతుల సలుప దగును.                                   69.

ఆ.వె.

గ్రంథపఠనమందు కాలయాపన చేయు

సవ్యమతుల నడ్డి సంతతంబు

దుఃఖమందు ద్రోయు దుర్వ్యసనాలపై

సమర మెల్లగతుల సలుప దగును.                                   70.

ఆ.వె.

దేహదీప్తి గూర్చి మోహంబు పుట్టించి

జనుని గూల్చునట్టి సరణులందు

కూరుకొనక వాని నోరిమితో గెల్వ

సమర మెల్లగతుల సలుప దగును.                                   71.

ఆ.వె.

కలిగినంత చాలు నలఘుసౌఖ్యం బేల

నంచు దలచ కూడ దంచిత మగు

హాయి నందగోరి యందు కానగురీతి

సమర మెల్లగతుల సలుప దగును.                                   72.

ఆ.వె.

మానవుండు సతము తాను కాంక్షించిన

లక్ష్య మందగోరి లక్షణముగ

చేయదగు ప్రయత్న మాయెడ వలసినన్

సమర మెల్లగతుల సలుప దగును.                                   73.

ఆ.వె.

ఆత్మరక్షణార్థ మత్యంతదీక్షతో

దక్షు డౌచు జనుడు తత్పరతను

గొంకకుండ సతము కువలయంబందున

సమర మెల్లగతుల సలుప దగును.                                   74.

ఆ.వె.

విశ్వవీధిలోన శాశ్వతంబుగ జన్మ

భూమి ఘనత చాటు కామనలకు

నడ్డు తగులు నట్టి యాటంకములపైన

సమర మెల్లగతుల సలుప దగును.                                   75.

ఆ.వె.

సర్వజగతిలోన సజ్జనుండను ఖ్యాతి

నందగోరు వ్యక్తి యిందు నుండి

జవము నణచునట్టి యవగుణరాశిపై

సమర మెల్లగతుల సలుప దగును.                                   76.

ఆ.వె.

వేదభూమిలోని విమలధర్మంబులన్

పుడమిలోన జాట గడగువాడు

తారసిల్లునట్టి దనుజభావాలపై

సమర మెల్లగతుల సలుప దగును.                                   77.

ఆ.వె.

నీతిమాలి జనుడు నిత్య మీ భూమిలో

దుఃఖ మొసగునట్టి దుష్కృతులను

చేయుచుండె వాని ఛీయంచు నాపంగ

సమర మెల్లగతుల సలుప దగును.                           78.

ఆ.వె.

పిన్నవారిలోన పెద్దలన్నను భక్తి

ప్రేమ పిన్నలందు వృద్ధులకును

గలుగజేయు కొరకు కానైనరీతిలో

సమర మెల్లగతుల సలుప దగును.                           79.

ఆ.వె.

ఇంద్రియములరాశి యీదేహ మందున

బహుళకష్టతతుల నహరహమ్ము

కలుగజేయుచుండు కావున దానిపై

సమర మెల్లగతుల సలుప దగును.                           80.

ఆ.వె.

తుచ్ఛసుఖము లొసగి స్వేచ్ఛను భక్షించి

జీవనంబులోన స్థిరతరమగు

కష్ట మొసగునట్టి దుష్టభావాలతో

సమర మెల్లగతుల సలుప దగును.                           81.

ఆ.వె.

చిన్నపిల్లలందు, కన్నవారలయందు,

మహిళలందు నట్లె మాన్యులందు

నాదరంబు లేని యవ్వారలను మార్చ

సమర మెల్లగతుల సలుప దగును.                           82.

ఆ.వె.

ప్రజల సొమ్ముతోడ బహుసౌఖ్యములనంది

ధ్యాసలోన వారి యూసులేక

తిరుగుచుండు నేత ధీరత్వమును ద్రుంచ

సమర మెల్లగతుల సలుప దగును.                           83.

ఆ.వె.

అఖిలజగతిలోన నాధునికాఖ్యతో

జేరియుండి కష్టకారణమయి

నిలిచియున్నదాని నిజరూపమును దెల్ప

సమర మెల్లగతుల సలుప దగును.                           84.

ఆ.వె.

హరిహరాదులందు నఖిలదైవములందు

భేదభావ మరసి ఖేద పడెడు

జనుల చిత్తమందు సవ్యత్వమును జేర్చ

సమర మెల్లగతుల సలుప దగును.                           85.

ఆ.వె.

జీవహింస జనుని పావనత్వము గూల్చు

నిడుము లందు ద్రోయు నెల్లజగతి

ననెడి వాస్తవంబు నతనికి నేర్పంగ

సమర మెల్లగతుల సలుప దగును.                           86.

ఆ.వె.

ఘోరమైనరీతి గోమాత నీనేల

గష్టమందు ద్రోయు కఠినులందు

బ్రేమ బుట్ట జేయ నీమంబుగానంది

సమర మెల్లగతుల సలుప దగును.                           87.

ఆ.వె.

కుక్షి నింపుకొనగ క్షుద్బాధ నణచంగ

లేవె కూర లెన్నొ జీవహింస

తగదు మిత్రులార! జగతి నంచును దెల్ప

సమర మెల్లగతుల సలుప దగును.                           88.

ఆ.వె.

దైవపూజలందు ధనమును వెచ్చించు

మానవుండు చూడ దీనులందు

దయను జూప డౌర! తద్గత యత్నాన

సమర మెల్లగతుల సలుప దగును.                           89.

ఆ.వె.

విజయ మందగోరి విస్తృతంబగురీతి

వరుస దాన మొసగు వాక్కులందు

నేతయైన పిదప నాతని కది దెల్ప

సమర మెల్లగతుల సలుప దగును.                           90.

ఆ.వె.

ఇంటిలోన గాని యిలలోన నైనను

స్వీయభావములకు జేటు గలుగు

విధము గూడెనేని వేయేల దానికై

సమర మెల్లగతుల సలుప దగును.                           91.

ఆ.వె.

వేలరకములందు విఘ్నేశ్వరుని రూపు

మార్చుచుండె నిచట మానవుండు

వాస్తవంబు జూపి వానికి బోధించ

సమర మెల్లగతుల సలుప దగును.                           92.

ఆ.వె.

కులము మతము లంచు నిలలోన నిత్యమ్ము

తగవు లాడుకొనుట తగదు నిజము

దీని దెలిపి జనుని జ్ఞానాన్వితుని జేయ

సమర మెల్లగతుల సలుప దగును.                           93.

ఆ.వె.

వృక్ష మెల్లవేళ రక్షించు మనుజుని

సత్యమంచు దెలిసి నిత్య మిచట

నరుకుచుండునట్టి నరుని బోధించంగ

సమర మెల్లగతుల సలుప దగును.                           94.

ఆ.వె.

కలుషితాత్ము లౌచు ఖాద్యవస్తువులందు

కశ్మలంబు లన్ని కలుపుచుండు

మనుజు గృత్యములను మాన్పంగ సరియైన

సమర మెల్లగతుల సలుప దగును.                           95.

ఆ.వె.

దైవమందు భక్తి, ధర్మాస్థ సచ్ఛీల

మంది యున్న జనున కనవరతము

చేటు గలుగ జేయు చెనటిని మార్చంగ

సమర మెల్లగతుల సలుప దగును.                           96.

ఆ.వె.

ఇచట జన్మ నంది యీదేశమున కేను

హితము గూర్చినాడ నేమి యిచ్చె

నాకు దేశ మనెడి నరుని మార్చగ బూన

సమర మెల్లగతుల సలుప దగును.                           97.

ఆ.వె.

పనులు చేయుకొరకు ఘనతరమౌరీతి

చేయి చాపు టొక్క ధ్యేయముగను

సంచరించు జనుని సవ్యమార్గము ద్రిప్ప

సమర మెల్లగతుల సలుప దగును.                           98.

ఆ.వె.

బాలలందు గూడ పశువులై చరియించు

దుష్టజనులలోని దుర్మతులను

పారద్రోల గడగి చేరజూచినవారు

సమర మెల్లగతుల సలుప దగును.                           99.

ఆ.వె.

కలుషపూర్ణు లౌచు కాషాయములు దాల్చి

జనుల మోసగించు ఘనుల కిలను

సవ్యమైన రీతి సత్యంబు జూపించు

సమర మెల్లగతుల సలుప దగును.                           100.

ఆ.వె.

చదువులందు మొదటి స్థానంబునకు జేరి

యగ్రపదము భావి నందగోరు

ఛాత్రు లిచట గలుగు సర్వవిఘ్నములందు

సమర మెల్లగతుల సలుప దగును.                           101.

ఆ.వె.

సారహీనమైన సంసారజలధిలో

మునిగియుండి సుఖము  ఘనతరముగ

నందగోరువార లందు కష్టాలతో

సమర మెల్లగతుల సలుప దగును.                           102.

ఆ.వె.

దైవదర్శనంబు కావలెనని యెంచు

వాడు దీక్షతోడ భావమందు

నంటియుండునట్టి యస్థిరత్వము పైన

సమర మెల్లగతుల సలుప దగును.                           103.

ఆ.వె.

మంచిపనులు చేయు మానసంబున నుంటి

నందకుండె ఫలిత మనెడి జనుడు

చేవజూపి స్వీయ భావజాలంబుపై

సమర మెల్లగతుల సలుప దగును.                           104.

ఆ.వె.

ధనము గలుగువారు ధరలోన భూతమై

పేదవారి నెల్ల పీడలకును

జేర నెట్టు చుండు దారిద్ర్యమును గూల్చ

సమర మెల్లగతుల సలుప దగును.                           105.

ఆ.వె.

శక్తి గలుగువాడు సత్వంబు జూపించి

జన్మభూమికొరకు సన్మతియయి

దుర్మదాంధులందు కర్మఠుడై నిల్చి

సమర మెల్లగతుల సలుప దగును.                           106.      

ఆ.వె.

సభలలోన సతము సత్కీరి నందంగ

గోరువాడు నాశ కారణమయి

యాత్మలోన జేరు నహముపై నిత్యమ్ము

సమర మెల్లగతుల సలుప దగును.                           107.

ఆ.వె.

భావపరిమళంబు పదిమందికిని బంచ

గోరుచుండువాడు ఘోరములగు

నాత్మనంటుకొనెడి యరులపై సతతంబు

సమర మెల్లగతుల సలుప దగును.                           108.

ఆ.వె.

ఆదివార మగుట హరివంశజుండైన

"మూర్తి" వ్రాసె నేడు ముదముతోడ

భవ్యయశము గల్గు "ప్రజపద్యసభలోన"

"సమరశతక"మొకటి క్రమముగాను. 109.

హ.వేం.స.నా.మూర్తి.

15.09.2019.