ఆరోగ్యమే మహాభాగ్యం
క్షణము నిలువకుండ సర్వకాలములందుధనము కూడబెట్టి దాచుకొన్న,
తనువు నంటెనేని ఘనరోగజాలంబు
లందగలడె సుఖము లవని జనుడు?
శాస్త్రచయము చదివి సంస్కారములు నేర్చి
యశము పొందుచున్న నిశయు పవలు,
స్వాస్థ్యసుఖము లేక సంతృప్తి కలుగంగ
బోవ దెవ్వరికిని పుడమిలోన.
పదవులిన్ని పొంది ముదమందుచున్నాడ
నాకు చింతలేదు నమ్ముడనుచు
పలుకుచుండువాడు పరమాత్ముడైనను
రోగియైన వాని భోగ మేమి?
ఇల్లు పిల్ల లరయ నిల్లాలు బంధువుల్
సఖులు వాహనాలు సర్వమున్న
నవనిలోన నెప్పు డారోగ్యహీనుండు
పొందలేడు సుఖము లెందుజనిన.
ధరణిలోని సుఖము లరయంగ నన్నింట
గొప్పదనుచు నిట్లు చెప్పవలయు
ననుపమంపు విత్త మారోగ్యభాగ్యంబు
మానవాళి కెప్పుడైన గాని.
No comments:
Post a Comment