తెలుగువారి వారసత్వము
పర్వదినమున పూజల నిర్వహణము
బూరె పులిహోర గారెలు పూర్ణములను
రాజసంబగు పర్వాన్న భోజనంబు
వారసత్వంబిది తెలుగు వారలకును
ఆవకాయయు గోంగూర యనుపమమగు
కందిపచ్చడి సున్నియు నందమైన
పులుసు వడియంబు లప్పడా ల్భోజనమున
వారసత్వంబిది తెలుగు వారలకును
తల్లిదండ్రులతండ్రులు, తాతలికను
దేవగణముల పేర్లను దీప్తి మెరయ
పిల్లలకు బెట్టి భక్తితో పిలుచుకొనుట
వారసత్వంబిది తెలుగు వారలకును
ధర్మకార్యాలు సాంఘిక కర్మములును
సాధుసంగంబు భగదారాధనంబు
పావనంబైన సౌభ్రాతృభావనంబు
వారసత్వంబిది తెలుగు వారలకును
తల్లిదండ్రుల సేవయు నెల్లజగతి
దేశభక్తిని చాటుచు లేశమైన
భీతినందక విమలమౌ ఖ్యాతి గనుట
వారసత్వంబిది తెలుగు వారలకును
No comments:
Post a Comment