శ్రీ వి జ య ఉ గా ది శు భ కా మ న లు
(సుందర కందపద్య త్రయోదశి)శ్రీ "విజయ" వత్సరంబున
శ్రీవైభవదీప్తులంది స్థిరసౌఖ్యంబుల్
భావస్వచ్ఛత యేర్పడి
దైవానుగ్రహము కలుగు ధరవారలకున్.
వినయము ఛాత్రగణంబుల
కనయము "విజయాఖ్య" నూత్న హాయనమందున్
ధనమై వెలుగంగా నిల
ఘనయశములు కూడుగాత, క్రమశిక్షణతోన్.
జయములు, సంతోషంబుల
మయమగు జనజీవనంబు మహినన్నింటన్
రయమున "విజయాబ్దం"బున
ప్రియములు సిద్ధించుగాత, విస్తృతరీతిన్.
యజనములు సాగగావలె
"విజయాబ్దము"నందు భువిని వేదోక్తముగా
త్రిజగద్రక్షకు డాహరి
ప్రజలందరి కిచ్చుగాత, బహుభాగ్యంబుల్.
ఉవిదల సమ్మానం బీ
భువిలో "విజయాబ్ద"మందు పూర్వపుభంగిన్
వివిధోత్సవముల జరుగగ
కువలయమున దీరుచుండు కోరిక లెల్లన్.
గారవము సర్వవిధముల
వారికి చేకూరు "విజయ"వత్సరమందున్
మీరక విధ్యుక్తం బె
వ్వారలు చరియించుచుంద్రు భారతభూమిన్.
దినదిన వృద్ధిని బొందుచు
మనభారత మన్నిగతుల మాన్యతనందున్
ఘనముగ "విజయాబ్దం"బున
ధనకనకములందుగాత ధరనందరకున్.
శుభసంతతి సర్వత్రయు
ప్రభవించును విశ్వమందు భాగ్యవశానన్
ప్రభవాది వత్సరంబుల
నభయద మీ "విజయనామ" హాయన మగుటన్.
భగవంతుని సత్కృపచే
నగణిత సస్యాభివృద్ధి యనవరతం బీ
జగమున "విజయాబ్దం"బున
నగుగాత సువృష్టి గలిగి యానందముగాన్.
కామితములెల్ల దీరును
దామోదరు భక్తి గొలువ ధరనందరకున్
శ్రీమంతమౌను సర్వము
భూమిన్ "విజయాబ్ద"మందు పుణ్యం బబ్బున్.
మమతానురాగ మేర్పడు
సమతాభావంబు కలిగి సఖ్యత కూడున్
భ్రమలన్ని తొలగి చేకురు
నమలిన సౌఖ్యంబు "విజయ"హాయనమందున్.
నవపర్వము లేర్పడగల
వవినీతికి నంత్యకాల మారంభమగున్
వివిధోత్సవములు జరిగెడు
నవనిన్ "విజయా"హ్వయాబ్దమం దెల్లెడలన్.
లుప్తములైన స్వధర్మము
లాప్తతతో వృద్ధిచెంది యామ్నాయజసం
దీప్తులు లోకంబంతట
వ్యాప్తములౌ "విజయ"నామ వత్సరమందున్.
No comments:
Post a Comment