భోగిమంటలు

పద్య రచన - 220 

ఆదివారం 13 జనవరి 2013

 

భోగములకు సూచకముల్
వేగమె దహియించివేయు విపులాఘములన్
రోగహరంబగు నికపై
పోగొట్టును దు:ఖమండ్రు భోగిని మంటల్.

 
మకరమునకు మార్తాండుడు
సకలంబును గాచువాడు చనుదెంచగఁ దాఁ
బ్రకటితమౌ నయనం బిదె
యికపై శుభమంచు చేతు రీమంట లిలన్.

అయనద్వయమున శ్రేష్ఠము
సుయశంబులు కూర్చుచుండు సుందరమిదియున్
భయమేలా రండిక నఘ
చయమును గాల్చంగ ననుచు జనులీ భోగిన్

ఉదయాత్పూర్వము మిక్కిలి
ముదమందుచు చేరినిల్చి మునుపటి దొసగుల్
మదిలో నిండిన కల్మష
మది గాల్తురు భోగిమంటలం దెల్లెడలన్.

ఈవిధి నిర్మలమతులై
కావింతురు ధర్మకృతులు ఘనముగ మీదన్
పావన మీసంక్రమణము
భావింపగ పుణ్యదంబు భాగ్యప్రదమున్.