2013 శుభాకాంక్షలు
(ఉత్పలమాలిక)
నూతన వత్సరాదిని, మనోహర వేళను పండితార్యులిట్లాతత మైన భావముల హాయనముం గని స్వాగతించ నా
చేతము సంతసించెను విశేషవచస్సులు పద్యపంక్తులై
భూతలికీ నవాబ్దమును భూరిసుఖంబుల నిచ్చి కావగా
జోతలు చేయబూనినవి "సుందరనూతనవర్షరాజమా!
ఖ్యాతులు సన్నగిల్లె, మరియాదయు మానసమందు లేదు, మా
నేతల కెల్ల వేళ నవినీతి విహారము దక్క వేరిలన్
రోతగ మారిపోయినది, రుగ్మత లట్టు లధర్మకృత్యముల్,
నీతివిహీనవర్తనలు నిత్యములై యబలాబలాత్కృతుల్,
హేతువులేని దౌష్ట్యములు, హింసలు వృద్ధిని బొందుచుండగా
రాతిరియున్, పవల్ గురుతరంబగు బాధలు కష్టనష్టముల్
భీతిని గూర్చుచుండి విలపింపగ జేయుచు విస్తరించ భూ
మాతకు శాంతిసౌఖ్యములు మచ్చునకైనను కానరాక యీ
భూతవిముక్తి గోరి తలపోయుచునున్నది కాచుదానవై
యో తరుణాబ్దమా! నిలిచి యుర్వికి మేలగు శాంతిసూత్రముల్
శీతలవాయువుల్ కలుగ జేయుము సౌఖ్యము గూర్చు మెల్లెడన్.
No comments:
Post a Comment