చెట్టు
మ.
సిరులన్ బంచుచునుందు
వెన్నిగతులన్ జీల్చంగ యత్నించినన్
నరులం దాగ్రహ మించుకేని
దెలుప న్గాంక్షించబో వెప్పు డో
ధరణీజంబ! శుభాశయాన్విత!
మహద్దాక్షిణ్యసంశోభితా!
కరుణాపూర్ణ! నమస్కృతుల్
కొనుమిదే కామ్యప్రదా! వృక్షమా! 1.
మ.
పరు లీజీవులు వీరికేవిధిని
నే బంచం దగున్ సౌఖ్యముల్
కరుణాహీనులు వీరలంచు
మదిలో క్రౌర్యాత్మకంబైన ఛీ
త్కర భావంబును దాల్చబో
వనిశమున్ గల్యాణముల్ గూర్చగా
వెరవం జూడవు దైవ
మౌచు జనులన్ బ్రేమింతు వో భూజమా! 2.
మ.
పలుకన్ సాధ్యమె
నీ మనస్స్థితమునై వర్ధిల్లు నౌదార్యమున్
కలికాలంబున నీవుగాక
మరి యొక్కండైన నీరీతిగా
దలపన్ జాలునె లోకమంతటికి
సద్భాగ్యంబు చేకూర్చగా
నలఘుస్వాదుఫలప్రదాత!
నతు లే నందింతు నోవృక్షమా 3.
మ.
నిను ఖండించును
మానవుండు ఖలుడై నిత్యంబు స్వార్థంబుతో
ఘనసంతాపము కల్గజేయు నయినన్ గారుణ్యబావంబుతో
మనుజాళిన్ భవదీయసంతతినిగా
మన్నించి యవ్వానికిన్
మనగా నీడను గూర్చుచుందు
వదె సన్మానంబుగా భూజమా! 4.
మ.
రసవంతంబగు సత్ఫలంబు
లిచటన్ బ్రహ్లాదముం గూర్చుచున్
వసుధన్ బంచగ దాల్చియుండి
యురుసద్భావంబు నీవందినన్
గసితో మానవకోటి
నీపయి శిలాఖండంబులన్ రువ్వినన్
పసివారంచు క్షమించుచుందువు
కృపాపారీణ వోవృక్షమా! 5.
మ.
క్షితికిన్ నీవు
విభూషణంబ వగుచున్ క్షేమాకృతిన్ దాల్చి నీ
చతురత్వంబును జూపి
జన్మదకు సంస్కారాఢ్యవై యన్నిటన్
నుతులందంగల శక్తి
గూర్చుచు మహన్నూత్నప్రకాశంబులం
దతులానందము నింపు
ధన్యవు భళా! హర్షంబు హే భూజమా! 6.
మ.
అరియై నిన్ను నశింపజేయుటకునై
యత్నింప నేతెంచు న
ప్పరశున్ జూచి యభీష్టసిద్ధికొరకై
భవ్యోపశాఖంబు స
త్వరమున్ దండముగాగ
నిత్తు వెదిరిన్ బాపాత్ము బ్రేమించుటం
దొరు లెవ్వారలు
నీకు సాటి? నతులో యుర్వీజమా! వృక్షమా! 7.
మ.
అసువుల్ దేహము వీడిపోయినను
నీ వత్యంత సద్భావనా
భ్యసనంబున్ ద్యజియించకుండ
నిను సర్వక్షేమ సంధాయినిన్
గసితో గూల్చినవాడు
కూలిన తరిన్ గాల్చంగ నందుండి యా
దెస దోసంబుల నెంచబోవు
భళి నీ దివ్యత్వ మో భూజమా! 8.
మ.
కలుషంబుల్ హరియించి
జంతుతతికిన్ గానైన స్వాస్థ్యంబులన్
నిలుపన్ జాలిన ప్రాణదాతవు
గదా! నిన్నెంచగా శక్యమే?
పలుకుల్ నాకు లభించునే?
విమలసద్భావంబుతో నీకు నీ
యిలపై రక్షణ గూర్తు,
కావుము సదా యిందుండి హే వృక్షమా! 9.
No comments:
Post a Comment