మానవా

మానవా
చం.
నిరతము స్వార్థచింతనము నిష్ఠను బూనుచు చేయుచుందు వీ
ధరణిని సర్వసంపదలు దాల్చి భవంబును బొందినాడవో?
పరమున కేగు కాలమున వానిని చేతధరించి పోవు త
త్సరణి నెరింగినాడవొ? విధం బిదియా వసియించ? మానవా!   1.
ఉ.
నీవొక సంఘజీవి వనునిత్యము సాటిజనాల మధ్యనే
చేవను బొందుచుండెదవు, శ్రీలు గడించుచు వారి చెంతనే
దీవన లందుచుండెదవు, దీప్తిని గాంతువు,తత్సమాజ స
త్సేవకు నూహసేయ వది చెల్లునె? యజ్ఞత యేల? మానవా! 2.
చం.
భవము నొసంగియున్న భగవానుడు నిన్నిట కంపునాడు నీ
వవనిని జేయగాదగిన దంతయు స్పష్టము చేయకుండెనే?
యవుర! యిదేమి, యీగతి నిహంబున నుంటివి? యిట్లు చేయగా
స్తవముల నందగల్గుదువె? ధన్యుడ వౌదువె యిందు? మానవా! 3.
ఉ.
పావనమైన జన్మమున బాధ్యత నెంచుచు మంచిచెడ్డలన్
భావన చేయలేని పలు ప్రాణులు సైతము సంఘసేవకై
యేవిధి తత్పరంబునను నిమ్మహిలో చరియించుచుండెనో
తావకదృష్టికిన్ తగులదా? యిది చిత్రము గాదె? మానవా! 4.
చం.
అకలుష భావనాయుతుడ వౌచును ధార్మికవర్తనంబునన్
సకలము నాత్మరూపముగ సర్వవిధంబుల నెంచుచుండి సే
వకు నగు మానసంబు గని వైభవ మందుచునుండి దేవతా
నికరము చూపు సత్కృపను నిత్యము పొందుము నీవు మానవా! 5.
ఉ.
అన్నిటికన్న మిన్నయని యార్యులు సెప్పిన యీభవంబు ము
న్నెన్నడు చేసి యున్న యఘహీన సుకర్మల సత్ఫలంబొ యిం
కెన్నడు నైన కల్గుటకు నీశ్వరసత్కృప యంద నుందువో
యెన్నగ లేవు మేలుకొను మేల విలంబము చేయ? మానవా! 6.

హ.వేం.స.నా.మూర్తి.
01.09.2018