శ్రీమాత

16.10.2012 వ తేదీ శంకరాభరణం బ్లాగులో

 పద్యరచన శీర్షికన ఇవ్వబడిన చిత్రానికి వ్రాసిన 

పద్యవ్యాఖ్య

 

 శ్రీమాత

శ్రీమాతను నే దలచెద
క్షేమంబును గోరి సతము స్థిరచిత్తుడనై
మామక కల్మషజాలము
లా మమతానిలయ బాపు నతివత్సలతన్.

జగదాధారవు తల్లీ!
నిగమంబులు బలుకుచుండు నీమహిమల నో
యగజాత! లోకపావని!
యగణిత వైభవము లొసగు మఖిలంబునకున్.

దయజూపు మమ్మ! మాపై
జయసిద్ధుల నందజేసి సకలజగాలన్
భయరహితుల నొనరించుచు
రయమున ధార్మికత గూర్చి రక్షించు మికన్.

నవరాత్రుల దీక్షలతో
హవనంబులు చేయుచుండి యనవరతంబున్
భవదీయ నామ మెల్లెడ
నవనతులై దలచువారి కబ్బును సుఖముల్.

నీవే జగదంబిక విక
నీవే నను గావగలవు నిన్ను దలంతున్
దేవీ! దుర్గామాతా!
రావమ్మా! యశములొసగి రక్షించుటకై.