శ్రీ ఉజ్జయినీ మహాకాళేశ్వర స్తుతి.

 

శ్రీరామ.                                                        శ్రీ శివాయ నమః

శ్రీ ఉజ్జయినీ మహాకాళేశ్వర స్తుతి.

(ఛందము-మానిని)

శ్రీల నొసంగెడి  చిన్మయరూపుడు  శ్రీపతి  కొల్చెడి  క్షేమదుడున్

లీలలు జూపుచు   క్లేశము  లన్నియు  లిప్తను బాపు నిలింపుడు తా

నాలము చేయక  యాశ్రితభక్తుల   నందరి గాచుట   యందు మహా

కాలుని నామము కాంక్షదుడై యిట గైకొని యుండె సుఖక్రముడై.             1.

 

ఉజ్జయినీపతి!  యున్నత భావము లుర్వి నజస్రము నొప్పలరన్

ముజ్జగముల్ నిను మ్రొక్కుచు విస్తృత మోదము గోరుచు మోకరిలన్

సజ్జయముల్ గన సంతసముల్ గొను సత్వము జూపుచు సాకెడి నీ

కుజ్జి యొకండిట నుండునె? కొల్చెద మో హర! దీనుల నోము మయా!      2.

 

ఈశ్వర! యుజ్జయినీశ్వర!  కాల! మహేశ్వర!  రక్షక!  హేగిరిశా!

శాశ్వతసౌఖ్యద!  సద్గతిదాయక!  సంతతహర్షద! సాధుయశా

విశ్వవిధాయక!  విజ్ఞజనాశయ!  ప్రేమకళామయ!  వేదనుతా!

శశ్వ దమేయసుశక్తి నిరూపక!  సన్నుతు లో శివ! సాకుమయా!                         3.

 

నిన్నిట నుజ్జయినిన్ జనులందరు నిత్యము జేరుచు నీయెదుటన్

మన్నన చేయుచు మమ్ముల గావు ముమాపతి యంచు నమస్కృతులన్

భిన్నవిధంబుల భీతిని గూల్చగ వేడుచు జేయగ బ్రేమముతో

గ్రన్నన బ్రోచెడి కామ్యశుభంకర! కామవిరోధి! హరా! ప్రణతుల్.                  4.

 

ద్వాదశ సంఖ్యను ధారుణి పైనను దావకమూర్తులు తథ్యముగన్

మోదము గూర్చును మోక్షము నందెడి పూర్ణబలంబును బొంద శుభా

పాదిత సుస్థిర భాగ్యము జూపుచు బ్రాప్తిల జేయును వైభవముల్

నీదయ యుజ్జయినీస్థల మందున నిస్తుల మీశ్వర! నీకు నతుల్.                5.

 

పాపము లన్నియు బాయును శీఘ్రము పాహి మహేశ్వర! పాహి యనన్

నీపద ముజ్జయినీపతి! వీడక నిత్యము గొల్తుము నీదు దయన్

మాపయి జూపుము మానక కావుము మమ్మహిభూషణ! మారహరా!  

దీపిల జేయుము ధీబల మిచ్చట దేకువ నింపుచు  దేవవరా!                     6.

 

పుట్టుట గూర్తువు భూతలమందున  బూర్ణసుఖంబిడి పొమ్మనుచున్

గుట్టుగ నాడుచు గూల్చుచునుందువు కూడుట వీడుట క్రోధమతీ!

నెట్టన గల్గుట నీకగు మానవ! నిర్మలతన్ మది  నిల్పిన నీ

పట్టున హర్షము బాయని దౌనని పల్కెడి యీశ్వర! వందనముల్.              7.

 

పూర్వ మవంతిని  భూసుర కోటికి  మోదము గూల్చుచు పోడుములన్

సర్వము ద్రుంచుచు  సాగుచునుండు నిశాటుని దూషణు సత్వరమే

గర్విత భావుని ఖండన జేసెడి కాంక్షను నీవట కాలునిగా

శర్వ! కనంబడి చంద్రకళాధర! చంపితి వందుము సన్నుతులన్.                        8.

 

తావకభక్తుడు తా విధుసేనుడు ధన్యుడు సన్మణి దాల్చు నెడన్

పావన మయ్యది భాగ్యద మౌటను వైరము బూనుచు బార్థివులున్

జేవను జూపుచు జేకొన దానిని జేరిన వేళను శీఘ్రముగన్

భూవిభు నాతని బ్రోచిన శంకర! పూర్ణదయాకర! మ్రొక్కు లయా!                9.

 

నిత్యము నుజ్జయినీపతి! శంకర! నిన్ను దలంచుచు నిష్ఠను నీ

కత్యతి భక్తిని నాపగ లందలి యఛ్ఛజలంబున నర్చనకై

సత్యసుఖాస్పద! స్నానము గూర్చెడి సజ్జన పంక్తిని సాకునెడన్

వ్యత్యయముం గొను వైనము దాల్చని భస్మవిలేపన! వందనముల్.             10.

 

హ. వేం. స. నా. మూర్తి.

31.10.2021.