వృద్ధాప్యం-రెండవ బాల్యం

వృద్ధాప్యం-రెండవ బాల్యం

04.7.19

కం.

శుద్ధాంతరంగ సంయుత

మిద్ధరణిని ధర్మబద్ధ మెల్లరి కొరకై

సద్ధితము గోరుచుండెడి

వృద్ధాప్యము బాల్యనిభము విను డెట్టు లనన్. 1.

ఆ.వె.

చీకుచింత లెపుడు చేరంగ రాబోవు

స్వపరభేద మరయు నెపము గనము

కలిమి లేము లిటను బలిమి జూపించవు

రసను బాల్యనిభము ముసలితనము. 2.

కం.

అందరి క్షేమము గోరుచు

సుందరమగు భావి కొరకు శుభకామన లె

ప్డందించు ముసలితనమును

సందియమే లేదు బాల్య సమమని యనుటన్. 3.

ఆ.వె.

ధనము కూడబెట్టి యనయంబు సౌఖ్యాల

కొరకు కాంక్షసేయు సరణి లేదు

దొరకినంతలోన నరుసంబులను గాంచు

ముసలితనము బాల్యమునకు సమము. 4.

కం.

ప్రేమం బందును, సకలురు

క్షేమంబుల నడుగుచుండి కీర్తించెద రీ

భూమిని గన వృద్ధాప్యము

ధీమతులకు బాల్యసమము తెలియుడు దీనిన్. 5.

ఆ.వె.

బాలవాక్కు నిజము బ్రహ్మవాక్కని యండ్రు

పెద్దవారి మాట చద్దిమూట.

మెండు హితము గూర్చు రెండును భువిలోన

ముసలితనము బాల్యమునకు సమము. 6.