దేశాభివృద్ధిలో నాపాత్ర

దేశాభివృద్ధిలో నాపాత్ర

11.07.2019

ఉ.

శ్రీలిట నిత్యవాసమును జేయుచునుండు, పరోపకారియై

మేలును గోరుదేశమిది, మేదినిలోన శుభప్రదంబుగా

దాలిచె సద్యశంబు, లిట దథ్యముగా సుఖదీప్తి గూర్చు, వే

దాలకు జన్మభూమి సురధామము, భారత మార్యవాసమున్.                        1.

శా.

నాదేశంబిది సద్భవంబు నిచటన్ నాకున్ బ్రసాదించె స

మ్మోదంబుల్ ప్రజకిందు గూర్చు పనియే ముఖ్యంబుగా యెంచి నా

నాదివ్యాద్భుతభావనాపటలులన్ నవ్యప్రభావంబుతో

వేదాకారముతోడ బంచు జగతిన్ విజ్ఞత్వముం గాంచుచున్.                  2.

శా.

ఈనాదేశపు సంస్కృతీవిభవమం దిస్మంతయున్ ఘాతమిం

దేనాడున్ గలుగంగ నీయను సదా యింపారు సద్వర్తనన్

మానంజూడక ధర్మ రక్షకుడనై మాన్యత్వసద్భాగ్య సం

ధానంబున్ విధియంచు నెంచి నిలుతున్ ధన్యత్వమున్ గాంచెదన్.                ౩.

శా.

నాయీదేశసమాజరుగ్మతల, నా నందంబునుం గూల్చుచున్

హేయంబైన విధాన మానసములం దెప్పట్టునన్ నీచమౌ

ధ్యేయం బంది జనించు వాని విధమున్  తేజోవిహీనంబుగా

జేయన్ దీక్ష వహించెదన్ జగతికిన్ క్షేమంబు చేకూర్చెదన్.                          4.

మ.

ఖలులై యిమ్మహిలో భయంకరములౌ కర్మంబులం జేయుచున్

తలపం జాలని రీతి సంఘమునకున్ దాపంబు గల్గించి యా

వల మోదంబును గాంచు శక్తులకు సద్భావప్రదంబైన కై

తల సద్భోధన చేసెదన్  జగతిలో ధర్మంబునుం గావగన్.             5