రచ్చబండ

రచ్చబండ

ఊరివారంద రొకచోట చేరుచుండి
కష్టసుఖముల నెచ్చోట క్రమముగాను
పంచుకొనుచుందు రిలలోన బహుళగతుల
రమ్యమౌ ప్రాంత మయ్యది రచ్చబండ.

న్యాయ మిక్కడ మీకందజేయబడును
నమ్ము డీరలు మీకోర్కి వమ్ముగాదు
సందియంబింత లేకుండ సర్వజనులు
రండు రండంచు పలుకును రచ్చబండ.

చిన్న పిల్లల బ్రేమతో చేరబిలిచి
వివిధరీతుల క్రీడలు విస్తృతముగ
నేర్పుచుండును దీక్షతో నిత్యమౌర!
రమ్యమౌ ప్రాంత మయ్యది రచ్చబండ.

సేద దీర్చును జనులకు మోద మొసగు
వాదు లెన్నైన సరిజేసి యాదినుండి
యూరివారల బంధువై యుర్విలోన
నిచ్చలానంద మొసగదె రచ్చబండ.

రోష మణచును పోగొట్టు ద్వేషములను
మమత లొలికింపజేయుచు మనములందు
శత్రుభావము కూల్చుచు సంతసంబు
లిచ్చుచుండును జనులకు రచ్చబండ.