నూతన సంవత్సర శుభాకాంక్షలు

పద్య రచన - 208 

మంగళవారం 1 జనవరి 2013

 

నూతన సంవత్సర శుభాకాంక్షలు

నూతనవత్సర మందున
చేతో మోదంబు, సిరులు, స్థిరసద్యశముల్
నేతల సుజనత్వంబును
భూతలి కందంగ వలయు పూర్తిగ నికపై.

రెండువేలు గడిచి నిండుగా పండ్రెండు
వత్సరంబు లేగ వైభవముగ
వచ్చి నిలిచినట్టి వర్షరాజంబింక
సత్వ మొసగు గాత! సకలజగతి.

పదమూడవ యబ్దమునకు
సదమలహృదయంబుతోడ స్వాగత మనెదన్
నదులన్నియు సుజలములై
యదనున వర్షంబు గురియు హాయన మంతన్.

గతవత్సరమున గలిగిన
వెతలన్నియు తీరిపోయి విస్తృతసుఖముల్
క్షితిలో నిండంగావలె
నతులిత ధనవృద్ధి నూతనాబ్దంబందున్.


సమతాభావము నిండగ
మమతాన్విత హృదులతోడ మానవులిలలో
క్రమముగ నందెద రనిశం
బమలిన యశములను నూతనాబ్దమునందున్. 

         జవహర్ నవోదయ విద్యాలయంలో జరిగిన వేడుకలకోసం వ్రాసినవి.
ఈవత్సర మందంతట
శ్రీ వైభవ వృద్ధి కలిగి స్థిరసౌఖ్యంబుల్
వేవేల శుభములబ్బుత
ఈ విద్యాలయపుజనుల కీశ్వరు కృపచే.

విద్యార్థుల కావశ్యక
సద్యస్స్ఫురణంబు గల్గి సద్విద్యలలో
నద్యతన శక్తియుక్తులు
నుద్యోగక్షమత గూడుచుండగ వలయున్.

నికషలలో శ్రేష్ఠాంకము
లకళంక విశేషయశము లందగ వలయున్
సుకరములై పాఠ్యాంశము
లికపై కలుగంగవలయు నీప్సిత సిద్ధుల్.

గురుజనులకు సద్యశములు
నిరతము సంతోషదీప్తి నిత్యసుఖంబుల్
సరియగు స్వాస్థ్యప్రాప్తియు
నరయంగా గల్గు నూతనాబ్దంబందున్.

భారతవర్షంబున నిక
సారోదకవర్షజనిత సౌభాగ్యమునన్
కోరిన సస్యంబులు తని
వారగ ఫలియించుగాత హాయన మంతన్. 

ఉత్పలమాలిక

నూతన వత్సరాదిని, మనోహర వేళను పండితార్యులి
ట్లాతత హృద్యఛందమున హాయనముం గని స్వాగతించ నా
చేతము సంతసించెను విశేషవచస్సులు పద్యపంక్తులై
భూతలికీ నవాబ్దమును భూరిసుఖంబుల నిచ్చి కావగా
జోతలు చేయబూనినవి "సుందరనూతనవర్షరాజమా!
ఖ్యాతులు సన్నగిల్లె, మరియాదయు మానసమందు లేదు, మా
నేతల కెల్ల వేళ నవినీతి విహారము దక్క వేరిలన్
రోతగ మారిపోయినది, రుగ్మత లట్టు లధర్మకృత్యముల్,
నీతివిహీనవర్తనలు నిత్యములై యబలాబలాత్కృతుల్,
హేతువులేని దౌష్ట్యములు, హింసలు వృద్ధిని బొందుచుండగా
రాతిరియున్, పవల్ గురుతరంబగు బాధలు కష్టనష్టముల్
భీతిని గూర్చుచుండి విలపింపగ జేయుచు విస్తరించ భూ
మాతకు శాంతిసౌఖ్యములు మచ్చునకైనను కానరాక  యీ
భూతవిముక్తి గోరి తలపోయుచునున్నది కాచుదానవై
యో తరుణాబ్దమా! నిలిచి యుర్వికి మేలగు శాంతిసూత్రముల్
శీతలవాయువుల్ కలుగ జేయుము సౌఖ్యము గూర్చు మెల్లెడన్. 

తెలుగు వైభవం

పద్య రచన - 205 

(శనివారం 29 డిసెంబర్ 2012)

 

 

తెలుగు వైభవం

ఆంధ్రభోజుడాత డలనాడు బహుభాష
లరసి వాటి రసము లనుభవించి
తెలుగుభాషలోని తియ్యందనాలను
మెచ్చి పల్కె నిట్లు మేలటంచు.

సందియంబు లేదు సర్వాంగసుందరం
బైన భాష గాదె యాంధ్రభాష
నిత్యసత్యమియ్య దత్యంత మధురంబు
దేశభాషలందు తెలుగు లెస్స.
 
పలికినట్లుగానె భక్తిభావము బూని
కవులనాదరించి ఘనతగూర్చి
సాధుకార్యమంచు సాహిత్యసేవను
చేసి యుండి నట్టి శ్రేష్ఠుడతడు.

కృష్ణరాయవిభుని కృపచేత నలనాడు
తెలుగుతల్లి మిగుల వెలుగులీనె
ఘనతరంబులైన కావ్యంబు లెన్నియో
భాగ్యవశముచేత భవమునందె.

వర్తమానమందు పాలకాగ్రణులందు
మాతృభాషపైన మమత లేదు
సంఘటించ వలెను సాహితీ బంధువుల్
తెలుగు వైభవంబు నిలుపు కొరకు. 

శ్రీదత్త

పద్య రచన - 204 

శుక్రవారం 28 డిసెంబర్ 2012

 

 శ్రీదత్త

అనసూయాత్మజ! భగవన్!
ఘనచరిత! మహానుభావ! కల్మషహారీ!
మునిజనహృదయవిహారీ!
తనయుని ననుగావుమయ్య దత్తాత్రేయా!

 

అనసూయాత్మజ!వందన
మనువారల నాదరించి యతివత్సలతన్
ఘనతరశక్తుల నిచ్చుచు
ధనకనకము లొసగెదీవు దత్తాత్రేయా!

నవవిధ నిధులును, సిద్ధులు
వివిధాద్భుతమంత్రశక్తివిభవము లబ్బున్
స్తవనీయుని నిను గొల్చిన
ధవళితదివ్యాంగదీప్త! దత్తాత్రేయా!

మూర్తిత్రయరూపుడవై
యార్తుల బాధలను దీర్చి యనుపమ సుఖస
త్కీర్తులు సంతస మనిశము
కూర్తువు సుగుణప్రదాత! కూర్మిని దత్తా!

నీవే తండ్రివి జగముల
కీవే మముగాచువాడ వీప్సితవరదా!
దేవా! దత్తాత్రేయా!
రావే జగములను బ్రోవ రయముగ సుఖదా!

శ్రీకరుడవు సద్భక్తవ
శీకరుడవు దత్తదేవ! జిజ్ఞాసులకున్
ధీకరుడవు దీనులకు గృ
పాకరుడవు సతము నీకు ప్రణతులొనర్తున్. 

 

తెలుగు భాష

తెలుగు భాషాదినోత్సవం సందర్భంగా వ్రాసిన పద్యములు
తెలుగుభాష యన్న వెలుగులు విరజిమ్ము 
భాష గాదె భువన భాండమందు 
తెలుగువార లౌట దివ్యత నందుటే 
సందియంబు లేదు ఛాత్రు లార!.

తేనె లొలుకు భాష మానితంబగు భాష
మార్దవంబు జూపు మాతృ భాష
భాషలందు జూడ బహుసుందరంబంచు
పొగడ బడిన భాష భువిని నాడు.

నన్నయాది కవుల నున్నత మూర్తుల 
నఖిలజగతి యశము నందినట్టి
భారతాదులైన బహుమూల్య గ్రంథాల
నందజేయు భాష యాంధ్రభాష.

హాయి నందజేసి  యానందమును గూర్చి
మనిషి మనసులోన మమత నింపి

సోదరత్వభావ  మాదరంబున దెల్పు
భాష యాంధ్రభాష భారతమున.

విస్తృతాదరమున వివిధ భాషల లోని
శబ్ద సంపదలను స్వాగతించి 
తన్మయత్వ మంది తనలోన జేర్చెడి
భాష తెలుగు భాష భారతమున.

 నవంబర్ 16, 2012 3:32 సా

యతులు, ప్రాసలు, ఛందంబు లద్భుతమగు
గుణములను గూడి మథురమౌ ఫణుతులంది
చిత్తవికసన మొనరించు, సిరులు పంచు
హాయిగా గ్రోలరారె యాంధ్రామృతమ్ము.

విశ్వజనులార! కవులార! విజ్ఞులార!
పరమహితులైన సాహితీ బంధులార!
జాగుసేయగ నికనేల? సత్వరముగ
హాయిగా గ్రోలరారె యాంధ్రామృతమ్ము.

అన్యభాషలపై మోజు నధికముగను
దాల్చగానేల? సరళమై తథ్యముగను
"దేశభాషల లెస్స"యీ తెలుగు గాన
హాయిగా గ్రోలరారె యాంధ్రామృతమ్ము.

కులము, మతములు, గోత్రాలు తలపకుండ
పిన్న పెద్దల భేదాల నెన్నకుండ
మంచి పలుకుల బ్రేమను బంచు చుండు
హాయిగా గ్రోలరారె యాంధ్రామృతమ్ము.

జనుల నొకత్రాట నిలబెట్టి యనుపమగతి
నైకమత్యము బోధించు హర్షమునను
తెలుగునకు సాటి వేరొండు కలదె యెందు?
హాయిగా గ్రోలరారె యాంధ్రామృతమ్ము.

నరకాసురవధ-దీపావళి

పద్య రచన - 158  

సోమవారం 12 నవంబర్ 2012

  

నరకాసురవధ-దీపావళి

ధరణీసుతుడై యొక్కడు
నరకాసురనామమంది నానాగతులన్
సురులను పీడించుటచే
హరి సత్యను గూడి చేరి హతునొనరించెన్.

వరముల నందితి నాకిక
సరి లేరని విర్రవీగి సత్పురుషాళిన్
నిరసించి మదము జూపిన
నరకాసురు డేగె యముని నగరంబునకున్.

నరకాసురవధ గాంచిన
సురసంఘము సంతసించి సుమవర్షంబున్
కురిపించిరి సంతసమున
ధరవారలు దీపరాజి తమ గేహములన్

అరుసంబున నెల్లెడలను
వరుసలుగా తీర్చిదిద్ది వైభవమొప్పన్
వరదీపావళి పర్వము
జరుపంగా బూనినారు సద్భక్తినికన్

మరువక బాలురు, వృద్ధులు
పరమానందంబుతోడ ప్రతివత్సరమీ
సరదాల పర్వరాజము 

నిరుపమముగ జేతురిలను నిర్మలమతులై. 

 మంగళవారం 13 నవంబర్ 2012

శ్రీకరమీ దీపావళి
యాకరమై వెలుగుచుండు హర్షంబునకున్
చేకొని దీపంబులనిక
నేకాలము వెలుగజేయు డిమ్మహిలోనన్.

దీపము బ్రహ్మాత్మకమై
పాపంబుల నెల్ల బాపి భాగ్యములొస(గన్)గున్
దీపించు హృదుల లోపల
దీపము వెలిగించ నణగు తిమిరము వసుధన్.

జగదాధారము దీపం
బగణిత మహిమాన్వితంబు హర్షద మటపై
నిగమస్తుత్యము కావున
భగవంతుని రూపమంచు ప్రణతు లొనర్తున్.

నవంబర్ 13, 2012 11:33 ఉ

బుర్రకథ

పద్య రచన - 156 

శనివారం 10 నవంబర్ 2012

  

బుర్రకథ

 తందనాన యంచు ధరణిలో జనులకు
నాట పాట గూర్చి యనుపమమగు
రీతి కథను జెప్పి చేతంబు దీపింప
జేయు బుర్రకథలు శ్రీకరముగ


వర్తమానమైన పౌరాణికంబైన
రాజచరితమైన రమ్యఫణితి
వర్ణనంబు చేసి కర్ణపేయంబుగా
పలుకుచుందు రిందు భవ్యముగను.

తెలుగువారి లోని వెలుగుల కీకళ
సాక్ష్య మాంధ్రదేశసంస్కృతులను
హాయిగొల్పునట్టు లద్దమందున జూపు
పుడమి వారె కెందు బుర్రకథలు. 

నమో వేంకటేశ

 

 నమో వేంకటేశ

కలియుగంబునందు కలుషంబులను బాపి
భక్తకోటి గాచి వరములొసగ
తిరుమలేశుడౌచు దివ్యతేజంబుతో
వేంకటేశ్వరుండు వెలసె ధరను.

పాంచజన్యమైన భవ్యశంఖము బూని
ధర్మరక్షయౌ సుదర్శనంబు,
నిరుపమంబులైన తిరునామములతోడ
వేంకటేశ్వరుండు వెలసె ధరను.

భక్తితోడ నేడు ప్రణతులర్పింతును
కలియుగాధినాథు గొలుతు నెపుడు
వేడు కొందు నెందు నేడుకొండలవాని
ధర్మమూర్తి నెపుడు దలచుచుందు.