జయాపజయములు
జయము కలిగెనేని సంతోషమందుచు
నపజయంబు గలుగ నతులదు:ఖ
మనుభవించు జనుడు హర్షావమానాల
కతడు కారకుండె? యవని లోన.
విజ్ఞులార! నిజము విజయాపజయములు
పూర్వ నిశ్చితంబు లుర్విలోన
మర్మమెరుగ దగును కర్మానుసారంబు
లఖిలఫలచయంబు లందరకును.
కర్మలందు హక్కు కలదు మానవులకు
ఫలములందు లేదు, భాగ్యవశము
ఫలమటంచు దలచి పనులు చేయుటయందె
బుద్ధి నిలుపవలయు పుడమి జనుడు.
జయము నందినాడ భయమేల నాకంచు
విర్రవీగకుండ, విజయమందు,
నపజయంబునందు నతిశాంతచిత్తుడై
మసలుచుండ వలయు మానవునకు.
జయము కలుగ దనుచు చలియించకుండంగ
స్థిరత జూపుచుండి వరుసనంత
విజయసిద్ధియందు వినయాత్మకుండౌచు
మెలగుచుండువాడు మేటి భువిని.
అపజయంబులోన నంతర్గతంబుగా
జయము కలదు నిజము భయమదేల?
అపజయంబు, జయము లారెండు సహజంబు
లనుచు తెలియదగును మనుజునకును.
జయము గాంతు మనెడు సంకల్పబలముతో
స్థిరతబూని లక్ష్య మరయు వరకు
పట్టువిడువకుండ గట్టిగా యత్నంబు
సలుప పొందవచ్చు జయము నిజము.
అపజయంబు మనిషి కతిసౌఖ్యదంబైన
జయము నందు కొరకు సాధనంబె
కనుక దాని జూచి మనమున చింతించ
వలదు ముందు కేగవలయు గాని.
No comments:
Post a Comment