హ్యా పీ న్యూ ఇ య రం డీ

 అందరికి 

 *"హ్యా పీ న్యూ ఇ య రం డీ"*

కం.

" *హ్యా* పీన్యూయియ" రందరి

కీపృథ్విని మీకు నమర నెల్లసుఖంబుల్ 

దీపిల్లుడు శుభములు గని 

యాపరమేశ్వరునికరుణ నంది జయంబుల్.

ఆ.వె.

*పీ* డలన్ని తొలగి   విస్తృతంబగురీతి 

సుఖము లమరు గాత శుభము గూడి 

నూత్నవత్సరాన యత్నసిద్ధియు గల్గి 

హర్ష మందుగాత యన్నిగతుల.

కం.

*న్యూ* నత్వము దరిచేరని మానితసద్భావదీప్తి మనుజులలోనన్ 

జ్ఞానాధారిత మౌచును 

తానయి నివసించుగాత ధర నీవేళన్.

ఆ.వె.

*ఇ* లకువైభవంబు లెల్లరీతుల బెంచు 

భావజాలమంది పాలకులకు 

ప్రజలజీవనంబు భవ్యమై యీనూత్న

హాయనమ్ములోన నలరుగాత.

కం.

*య* శములు నిండగవలయును 

దశదిశలను గ్రమ్మునట్లు ధరనీ ప్రజకున్ 

నశియించి  యఘములన్నియు 

భృశమీ వత్సరమునందు విస్తృతఫణితిన్.

కం.

*రం* గారుసస్యసంపద 

సంగతముగ చేరుగాత సర్వంసహకున్ 

బంగారమౌచు పట్టిన 

దంగీకృత సౌఖ్య మిచట నందునుగాతన్.

కం.

*డీ* కొట్టి శక్తి చాటెడి 

ప్రాకటవిజ్ఞానభూతి భారతమందున్ 

చేకురి యీవత్సరమున

మీకమరును గాత ముదము మేలగురీతిన్.

2025 నూతనాంగ్లసంవత్సరారంభశుభవేళ 

అందరికీ

హృదయపూర్వకశుభాకాంక్షలు.

🙏🙏

హ.వేం.స.నా.మూర్తి.

వీరబాలలు / బాలవీరులు

 వీరబాలలం, బాలవీరులం

భరతమాత యశము పెంచు బాలవీరులం!!

భారతమున శత్రుగణము 

పన్నినట్టి వ్యూహరచన

ఛేదించిన అభిమన్యుని

సోదరులం వారసులం

 

సాహసమే మా ఊపిరి

సౌజన్యమె మాలో సిరి 

 ప్రమాదాల బారిపడ్ద

వారిని రక్షించుటకై 

ఎల్లవేళ దూకగల్గు

ధైర్యమ్మే అందము మరి

!!వీరబాలలం, బాలవీరులం

భరతమాత యశము పెంచు బాలవీరులం!!

పలనాటి యుద్ధమందు

అలనాడిల చెలరేగిన

బాలచంద్ర వీరునకును

తోబుట్టువులై విలసిల్లుచు

లోకంబును సాకునట్టి 

సత్వంబును చూపించుచు

మునులచేత ఘనులచేత 

జనులచేత సెహబాసని 

అనిపించుకు మనగలిగిన

!!వీరబాలలం, బాలవీరులం

భరతమాత యశము పెంచు బాలవీరులం!!

రామాయణ కాలంబున

రాముడినే అడ్డుకొనుచు

శౌర్యంబును చూపించిన

లవకుశులకు బంధువులం

 ఆ ధ్రువుడు, ప్రహ్లాదుడు

వృషకేతుడు, షణ్ముఖుడు

మా ఎదలం దెల్లప్పుడు 

నివసింతురు నిరుపమమగు

తేజమును చూపింతురు

!!వీరబాలలం, బాలవీరులం

భరతమాత యశము పెంచు బాలవీరులం!!

బాలలమని, అల్పులమని

భావించము మాలోగల

పూర్వీకుల శౌర్యంబును,

వంశీయుల ధైర్యంబును, 

సాహసమును, సత్వంబును

నిరంతరము స్మరియిస్తాం.

ఆపదలో చిక్కుకున్న

అసహాయుల రక్షణకై 

ముందు వెనుక లెంచకుండ 

అదియిది అని చూడకుండ

ధైర్యంతో చరియిస్తాం

శౌర్యంతో రాణిస్తాం

 !!వీరబాలలం, బాలవీరులం

భరతమాత యశము పెంచు బాలవీరులం!!

ఈపావన భరతావని 

శ్రేష్ఠారుణ దీప్తులతో 

విశ్వానికి సద్గురువై 

సౌఖ్యాలకు తానిరవై 

వరమొసగెడి సత్తరువై 

విలసిల్లుచు సుఖ్యాతిని 

కొనజేయగ మాబలమును

అనిశంబును చూపెదము

!!వీరబాలలం, బాలవీరులం

భరతమాత యశము పెంచు బాలవీరులం!!

పుడమితల్లి

 పుడమితల్లి

 *తరలము* 

పుడమి తల్లికి వందనం బిడి పూజ్యభావము జూపుటల్ 

బడులలోనను విద్యలందున బావనత్వము దెల్పుటల్ 

జడత వీడుచు నుత్సహించుచు సాధు మానసదీప్తితో

మడమ ద్రిప్పక రక్షసేయుట మానవత్వము తానగున్.    1.

 *తరలము* 

మనుజకోటికి జీవరాశికి మంగళంబులు గూర్చుచున్ 

ఘనతరంబగు సౌఖ్యసంపద కాంక్షితార్థము లిచ్చుచున్ 

మనుట కన్నివిధాల సాయము  మానకుండగ చేయు నీ

యనఘ కంజలి చేయగావలె నమ్మయౌ ధర కాత్మలోన్.  2.

 *తరలము* 

భవ మొసంగును స్వీయదేహపు పావనస్థలమందునన్

జవము దెల్పును సంతతంబును సత్వయుక్తికి కోరకే 

యవిరళంబగు వస్తుసంతతి నందజేయుచు నుండు నీ

యవని  యందరి మాత గావున నంజలించుట యుక్తమౌ.   3.

 *తరలము* 

అనుపమాఘము చేయుచుండిన నన్నిరీతుల దౌష్ట్యమున్ 

తనకు కర్మముగా దలంచుచు దాను జూపుచు నుండినన్ 

మనుజకోటిని రక్ష చేయుట మానకుండును ధాత్రి,యీ

జనని నాయతవత్సలాఢ్యను సన్నుతించుట ధర్మమౌ.  4.

 *తరలము* 

పుడమితల్లిని గాచుటౌ విధి  పూర్ణధర్మము తానగున్ 

వెడలిపొమ్మనకుండు నెంతటి ద్వేషభావముజూపినన్ 

విడిది గూర్చుచు నాదరించును విజ్ఞతాగరిమంబుతో 

నడుగబోవదు తన్ను జీల్చిన నాదరించును తల్లియై.   5.

హ.వేం.స.నా.మూర్తి.