ఎన్నికలవేళ

ఎన్నికలవేళ

మ.

అవకాశంబు లభించనుండె వినుమా! హాస్యంబు గాదోయి! నీ

జవమున్ సత్త్వము ధీవిశేషము లిటన్ సవ్యంబుగా జూపి సం

స్తవనీయంబగు రీతి నీదు మతమున్ ధైర్యంబుగా నిల్పి మా

నవ! నీనేతల నెన్నుకోవలయు విన్నాణంబుతో నిచ్చటన్.                                              1.

ఉ.

ఎన్నికలందు గెల్పుకయి యెన్నియొ మార్గము లెంచుచుండి ము

న్నెన్నడు లేనిరీతి యవహేళన చేయుచు ధర్మపద్ధతిన్

పన్నెద  రౌర! జిత్తులను వారల మాటల కీవు లొంగుచున్

గ్రన్నన నిర్ణయమ్ములను గైకొన కుండుట నీకు యుక్తమౌ                                               2.

ఉ.

నమ్ముము భారతీయ ఘననాగరికాగ్రణి! యోట్ల కోసమై

కమ్మని వాక్యముల్ పలికి కర్మఠుడైనటియించువానినిన్

నమ్మెద వేని యాపయిని నైజము జూపు నధీశుడౌ తరిన్

వమ్మొనరించు భావమును వాస్తవ మియ్యది దేశమందునన్.                                           ౩.

ఉ.

నేతను నిర్ణయించు నెడ  నిష్ఠను బూనక యుందువేని నీ

వ్రాతను మార్చివేసి పలు బాధలు వెట్టు , వికాస మంచు ని

శ్చేతను జేయు నిన్నిలను శీఘ్రగతిన్ బడద్రోయు  దుఃఖ సం

ఘాతము నందు మేల్కొనుము కాదనకుండగ భారతీయుడా!                                        4.   

సీ.      ఆహార మందింతు సౌహార్దమును జూపు

డార్యులు మీరంచు నను నొకండు 

భోజనార్థము మీకు భాజనంబులు గూర్చు

బాధ్యత నాదంచు పలుకు నొకడు

వాసంబు చేయంగ వసతిని సమకూర్చు

పని నాది యని యిచ్చు వచన మొకడు

ఆరోగ్య రక్షకై యన్ని సౌకర్యాలు

కలిగింతు ననియెడి ఘను డొకండు

వృద్ధుల పింఛన్లు విస్తృతంబుగ నిత్తు

నాగక నేనంచు నాడు నొకడు

అండయై యుండెద నుండుడు ధైర్యాన

నని బల్కుచుండెడి యత డొకండు

తల్లులారా! నాదు తండ్రులారా! యంచు

నాదరంబున బిల్చు నాత డొకడు

సోదరుండను నన్ను నాదరించుడు మిమ్ము

నాదుకోగలనంచు నను నొకండు

ఆ.వె.

బహుళ గతుల నిట్లు పలుకుచుండెడి వారు

తామె గెల్వ గోరి తథ్యముగను

త్యాగ మూర్తు లట్లు తారసిల్లుచు నుంద్రు

వారి హృదయ మరయ  వలయు జనుడ!                                                                    5.

ఆ.వె.

కల్ల బొల్లి మాట లెల్ల కాలం బిందు

చెల్ల బోవటంచు నుల్లమునకు

తెల్లమౌ విధాన మెల్లగ జూపించు

టెల్ల యుచిత మోయి! యొల్లకొనక.                                                                           6.

ఉ.

నీ మతదానమే మనకు నిర్మలమై వెలుగొందు పాలనన్,

శ్రామిక కర్షకాదిజనసంఘము గాచుచు నెల్లవారికిన్

క్షేమము నిండినట్టి సుఖజీవన మందగ జేయు గావునన్

ధీమతివై సమర్ధనము దెల్పుట  యుక్తము భారతీయుడా!                                              7.

శా.

దూరాలోచన లేక యల్పసుఖముల్ తోరంబుగా నెంచి దు

ర్వారానంతమహాపదన్ పడకుమీ భాగ్యాన్వితా! భారతా!

వీరిం బూనిన స్వార్థనామక బృహద్భీతావహవ్యాధులన్

పారంద్రోలగ యోగ్య కాల మిదియే ప్రాజ్ఞత్వముం జూపుమా.                              8.

శా.

వేదప్రాభవదీప్తమైన భువిలో విస్తారరూపంబునన్

ఖేదంబున్ గలిగించు భూతములకున్ క్షీణత్వముం బంచి స

మ్మోదం బీ భువినందగల్గు ఫణితిన్ ముఖ్యంబుగా నెంచి నీ

మీదం గల్గినయట్టి బాధ్యత లిటన్ మేలంచు పూరించుమా.                                             9.

కం.

వినదగును మాటలన్నియు

ఘనతరయోచనము చేసి కడు దక్షతతో

మనుజుల కల్యాణంబును

గని నీమత మిందు  దెల్పగావలె నోయీ.                                                                      10.

ఉ.

భావ మెరుంగు టెట్టులని పల్కెదవా? భగవాను సన్నిధిన్

దావక చిత్తమున్ నిలిపి తన్మయతన్ మలినంబు లన్నియున్

బోవగ ధ్యానమున్ సలిపి పొందగ నొప్పును శక్తి యుక్తులన్

నీవది చేసినన్ గలుగు నిర్ణయ దక్షత నిశ్చయంబుగన్.                                                    11.

ఉ.

నీకది నచ్చకున్న ననునిత్యము దీనజనాళిరక్షకై

తేకువ మీర నిల్చి సుఖదీప్తులు గాంచుచు మానసంబునన్

ప్రాకటమైనరీతి సుమబంధురభావపరంపరావళుల్

సోకెడు నట్టులుండిన వసుంధరగాచు బలంబు గూడెడిన్                                                12.

కం.

ఎటులైనను దేశంబును

పటుతరముగజేయ గల్గు భవ్యాత్మునకే

యిట  పీఠం బందగవలె

నటునిటు సడలంగ నీకు మచలాశయమున్.                                                                 13.

మ.

ఇది నీ బాధ్యత భారతీయ! వినుమా! యిప్పట్టునన్ వేరొకం

డెదలో జేరగనీకుమోయి విధిగా నెంతేనియున్ దీక్షతో

ముదమీ దేశమునందు నింపగల వామోదంబునుం దెల్పియీ

యదనున్ జేకొనుమోయి! భాగ్యదముగా నాశంక లేకుండగన్.                              14.

శా.

ఆకాశంబుననుండి దివ్యపురుషుం డత్యంతవాత్సల్యమున్

నీకై జూపుచు సత్ప్రభుత్వఘటనన్ నిష్ఠన్ బ్రసాదించగా

నేకాలంబుననైన రాడు మదిలో నెంతేనియున్ ధైర్య మీ

వీ కార్యంబున బూనగా వలయునోయీ!సౌఖ్య సంప్రాప్తికై.                                              15.