“కావ్య కన్యక”

“కావ్య కన్యక”

సకలాంధ్రసాహితీ సాగరంబునకెల్ల
           నగ్రజుడై వెల్గు నాదికవికి
నన్నపార్యున కెట్లు నానావిధంబులౌ
          యశము లబ్బెను నాడు దిశలనిండ,
ప్రేమతో తిక్కన్న సోమయాజిని తాను
          "మామ"యంచును బిల్చి మనుమసిద్ధి
అత్యుత్తమంబైన ఆదరంబును జూపి
           చేరదీయుచు నేల గారవించె,
ఇంపుగా కవియైన ఎర్రనార్యుం డెట్లు
           పరమేశ్వరత్వంబు పడయ గలిగె,
కవిసార్వభౌముడై యవనీతలంబందు
           కింకవీంద్రులనెల్ల హుంకరించు
శ్రీనాథకవిరాజు కానందమున జూడ
           స్వర్ణాభిషేకంబు జరిగెనేల,
కర్షకవృత్తితో కాలయాపన చేయు
           పోతనామాత్యుండు పూర్వమునను
సహజపండితుడంచు, సద్భక్తకవి యంచు
           ఖ్యాతినందుట కేమి కారణంబు,
గండపెండేరాది ఘనమగు సన్మాన
            మల్లసానికి రాయ లందజేసి
సురుచిరమౌరీతి పురమేగ జేయించి
          పల్లకి తనచేత పట్టెనేల,
విశ్వనాథయు నేటి విజ్ఞ సీ.నా.రెడ్డి
          జ్ఞానపీఠమునెక్కి మానితమగు
యశము నందంగ కారణ మయ్యదేమి?
సుందరంబైన యితివృత్త మందియుండి
పలురకంబుల ఛందాలు, భవ్యమైన
రీతులు, గుణంబు లందరి చేతమలర
చేయగలయట్టి శైలులు, హాయినొసగు
భావసంపత్తి మధురమౌ పలుకులుంచి
రచన కావించబడి యుండి ప్రచురములగు
ధర్మవిషయాలు వ్యవహార మర్మములును
బోధ చేయుచు, సన్మార్గ సాధనంబు
నగుచు ధరవారి కెల్లర కనవరతము
శుభములను గూర్చి బహువిధ విభవమొసగు
"కావ్యకన్యక"యేగాదె కారణంబు.