పాటలు

జవహర్ నవోదయ

జవహరు నెహురూ పేరున వెలసిన(నామాంకితమగు)

చదువుల నిలయం నవోదయం               //జవ//

          జగములనేలే జాగృతభారత

          నిర్మాణానికి మహోదయం            //జవ//

సద్గుణ సంయుత ఛాత్రాఖ్యంబగు

మణిమయ సదనం నవోదయం

ఆరావళి శివ నీలగిరులతో

ఉదయాచలమిది శుభోదయం                   //జవ//

          వినయవర్తనము విజ్ఞానము గల

          విమలాత్మకులౌ విద్యార్థులతో

          సాధుచరితులై సత్యమూర్తులౌ

          అధ్యాపకయుత నవోదయం            //జవ//

చదువూ సంధ్యలు సత్య సంధతా

సమతామమతల సదాశయం

ఆటపాటల నఖిలాభ్యుదయము

మంచిని పెంచెడి మహాశయం                   //జవ//

           కాశ్మీరంబూ కర్నాటకయూ

           అంతా భారత మందరమొకటని

           జాతీయైక్యత చాటుటకొరకై(సాధించుటకై)

           మైగ్రేషను కిట మహోదయం        //జవ//

హిందువులెవరూ యిసాయిలెవరూ

సిక్కు ముస్లిములు చిన్నా పెద్దా

సకల కులంబులు సర్వ జాతులూ 

సములే యనియెడి సదాశయం               //జవ//

గాంధీ స్తుతి గీతం

భారతదేశపు భాగ్య విధాతవు 

భవ్య చరితుడవు బాపూజీ

కారుణ్యామృత భరితాత్మకుడవు 

గర్వరహితుడవు గాంధీజీ                            //భారత//

        జాతికి పితవయి చరితార్థుడవయి

        అమల యశంబుల నందితి వయ్యా

        అస్పృశ్యభావం బసురత్వంబని

        సకల జగంబుల చాటితివయ్యా          //భారత//

సత్యాహింసలు, సద్భావంబులు

సహనశీలమే సత్కార్యమనీ

సర్వమతమ్ములు సమాన మంచును

దివిలో భువిలో తెలిపితివయ్యా                  //భారత//

          దేశమాటృకా దాస్యశృంఖలలు

          దీక్షాదక్షత దొలగించుటకై

          సర్వవిధంబుల సవ్యమార్గమని

          సత్యాగ్రహములు జరిపితివయ్యా     //భారత//

జన్మభూమికై సమస్త సుఖములు

తృణప్రాయముగా త్యజియించితివీ

స్వాధీనత్వము సాధించుటచే 

భవసార్థక్య నందితివీ                              //భారత//

          నీబలిదానము, నిర్మలభావము

          నిత్యగానమయి నిలవాలి

          భారతీయులకు "బాపూ" నామము

          ప్రాత: స్మరణము కావాలి.              //భారత//

విద్యాలయం(పాఠశాల)

చదువుసంధ్యలకు చక్కని నిలయము

సాధువర్తనకు నెలవుయిది,

సత్యం, ధర్మం, శాంతి యహింసలు

సమతా మమతల స్థానమిది                                //చదువు//
      అజ్ఞానంబను అంధకారమును

      ఆమూలాగ్రం బంత మొనర్చుచు

      జ్ఞానజ్యోతులు జగాన పంచెడి 

      కర్మశాలయే(యీ) విద్యాలయము                 //చదువు//

సమాజసేవయు, సమతాభావము

సత్ శీలంబును, సమయ స్ఫూర్తియు

బహువిద్యలతో పంచుచుండెదరు

శిష్యవత్సలత గురుజనులందరు                          //చదువు//
       సద్వినయముతో సత్పాత్రతతో

       మాన్యతనందుచు మనమందరము

       అన్నిటనుండుచు అధిక శ్రద్ధతో

       చక్కని చదువులు చదవాలి

సత్పౌరులము కావాలి/సత్పౌరులుగా కావాలి.         //చదువు//

(ధ్వజస్తుతి) మువ్వన్నెల జెండా

త్రివర్ణశోభిత సువర్ణ ధ్వజమిది

విమలతేజమున వెలుగునది

స్వతంత్రదీప్తియు, సౌభ్రాతృత్వము

సకజగంబుల చాటునది                                      //త్రివర్ణ//

          కాషాయము బహు కమనీయంబై

          శ్వేతవర్ణమది శాంతిరూపమై,

          హరిత యుక్తమై, అతిసుందరముగ

          ఇలలో నెల్లెడ యెగిరే ధ్వజమిది               //త్రివర్ణ//

జాతి విచక్షణ జనులకు తగదని

సర్వవర్ణములు సరిగా సమమని

వేదశాస్త్రముల విస్తృత భావము

దివికిని భువికిని తెలిపే ధ్వజమిది                     //త్రివర్ణ//

          శాంతి యహింసలు, సస్యశ్యామల

          మఖిలజగంబుల కావశ్యకమను

          విజయసూత్రమును త్రిజగంబులకు

          నిరతము చూపెడి నిర్మల ధ్వజమిది        //త్రివర్ణ// 

అంబేడ్కర్

వందనమయ్యా సుందరహృదయా వందనము

బాబాసాహెబ్ అంబేద్కరాఖ్యా! వందనము                     //వందన// 
           దేశాలెన్నో తిరిగినవాడవు,

           శాస్త్రాలెన్నో చదివినవాడవు

           భారతభూమికి  బహుమూల్యంబౌ

           రాజ్యాగంబును కూర్చినవాడవు                       //వందన//

                  దళితసోదరుల ఉద్ధరణార్థము

                  అవమానములే వరదానములని

                  ధర్మబద్ధముగ పోరులు సల్పుచు

                  జీవితమంతయు గడిపిన వాడవు            //వందన//

           మంచిమనసుతో మహనీయతతో

           కులమతభేదము కూడదటంచును

           సకలజనాళికి సమతను బంచుచు

           జాతిరత్నమై నిలిచినవాడవు                         //వందన// 

వివేకానందుడు

వందనము అభివందనము

వివేకానందున కందము లొలుకగ

వందనము అభివందనము                                  //వందన//

      నిత్యానందుడు నిర్మలచిత్తుడు
      నిఖిలాగమముల నిష్ణాతుండు
      భారతీయతను బహుదక్షతతో
      విశ్వజానాళికి విశదము జేసెను                       //వందన// 

ఋషులకు ఋషియై మనీషి యనియెడు

ఖ్యాతి వహించిన ఘనచరితుండు,

వివాదరహితుడు, వివేకభరితుడు

సుందరరూపుడు సుగుణాత్మకుడు                       //వందన//

      కార్యదీక్షితుడు, కాషాయాంబర
      ధారణ జేసెడు ధీరాత్ముండు,
      శాంతిప్రియుడును, సత్యాన్వేషియు
      రూపుధరించిన హిందూ ధర్మము                   //వందన// 

నవోదయ సద్భావగీతం

సోదరభావం మదిలో పెంచుక నవోదయంబున మెలగుదమా

తరతమ భేదము దరిరానీయక భారతీయతను చాటుదమా

                                                                            //సోదర//

మమతను నింపే మైగ్రేషనులో జాతీయైక్యత కనబడగా

చదువుల క్రీడల సహజీవనమున వివేకవృద్ధియె మనబడిగా

                                                             (వినబడగా)//సోదర//

మధురవాక్యముల గురుజనులందరు ఆప్యాయతనే పంచగనూ

సర్వకాలముల సద్బోధనలో జ్ఞానదీధితులు పెంచగనూ

                                                                             //సోదర//

తల్లీ తండ్రీ సర్వము తామౌ గురువుల ఖ్యాతిని పెంచుటకై

జన్మదాతలౌ జననీజనకుల స్వప్నము సత్యము చేయుటకై

                                                                             //సోదర// 

స్వాగతగీతం - 1

స్వాగతాంజలి విమలవినయ వినమితాంజలి

భక్తిభావకోటికుసుమపూరితాంజలి                       //స్వాగతా//

అతిథివరుల కధిక వత్సలాఢ్య జనులకు

సమతజూపి మమత బంచు సజ్జనాళికి                 //స్వాగతా//

జన్మనిచ్చి ప్రేమ బంచు జనక వరులకు

సత్యపథము జూపునట్టి సాధుజనులకు               //స్వాగతా//

యుష్మదమల మార్గదర్శనంబు గావలె

అస్మదంతరంగ వికసనంబు గావలె                      //స్వాగతా//

స్వాగతగీతం - 2

(పూర్వవిద్యార్థుల సమావేశానికి)

స్వాగతము, (సు)ఘనస్వాగతము

అగ్రజవరులకు స్వాగతము                               //స్వాగ//

          మీఆగమనము మిక్కిలి మోదము

          మీ పథదర్శన మనుసరణీయము

          మీ అనుభూతులు, మీఅనుభవములు 

          మాలో స్ఫూర్తిని, మంచిని పెంచును           //స్వాగ//

 చిన్నా, పెద్దా భేదము లేదని

మందిర మిదియని అందరు సమమను

సమరభావం - చదువులసారం

చక్కగ నేర్పే(నవోదయానికి)నవోదయంబున       //స్వాగ// 

 (ఎయిడ్సె అవేర్ నెస్ వీక్ సందర్భంగా 

విద్యార్థులతో ప్రచారం చేయించడానికి 

వ్రాసిన పాటలు)

ఎయిడ్స్ -  1

వద్దుబాబు వద్దురో ఈబ్రతుకు నాకొద్దు
చావొక్కటె మార్గంబు సరియైనా నిర్ణయము                 //వద్దు//
      ఏ జన్మలొ చేశానో, ఏ పాపం చేశానో
      ఈ జన్మాలోన నాకు ఈ ఎయిడ్సు రోగమొచ్చె

బహు దుర్లభమైన జబ్బు పగ వాడికి కూడ వద్దు         //వద్దు//

తల్లి, తండ్రి, అన్న, చెల్లి , పెండ్లా మందరినుండి

వల్లదనెడు మాటాయె పలుకరింత కరువాయె              //వద్దు//

      తోటి వారి నిట్లు వదిలి దులబరింత సరియగునా?

      మానవత్వ మన్నమాట మరచిపోవుటే తగునా?     //వద్దు//

వద్దు వద్దు వద్దంటూ  మరణము సరికాదంటూ

ఊతమిచ్చి వారిలోన ధీరతనూ పెంచాలి

అంటు వ్యాధి కాదంటూ ఎవరికంట బోదంటూ

మమత బంచి మాటలాడి మధురిమనే పంచాలి            //వద్దు//

ఎయిడ్స్ -  2

ఎయిడ్సంటె ఏమిటో ఎందుకదీ వస్తుందో
తెలుసుకొనగ రారండీ తెలియజేయ కదలండీ                  //ఎయిడ్సంటె// 
     మందు మాకు లేనిదండి, మహమ్మారి యిదియండీ

     చక్కగ జాగ్రత్త పడితె యిది ఎవరికి సోకదండీ            //ఎయిడ్సంటె// 

ముట్టుకుంటె రాదండీ మాటాడిన సోకదండి
ఇది సోకిన వారి కింత అనురాగం పంచండి                    //ఎయిడ్సంటె// 
     దానాలన్నింటిలోన రక్తదాన మన్నారు
     తెలియకుండ, తెలుసుకోక  రక్తము నివ్వద్దండీ         //ఎయిడ్సంటె// 

ఈ రుగ్మత నున్నవాళ్ళ నింటినుండి త్రోయకండి,

బ్రతికినంత కాలమైన బలమును చేకూర్చండి               //ఎయిడ్సంటె// 
     రామరాజ్యమండి మనది రాముడు మనదైవ మండి,

     ఏకపత్ని వ్రతమన్నది ఎప్పుడు మరి మరువకండి     //ఎయిడ్సంటె// 

తుచ్ఛమైన సుఖము గోరి విచ్చలవిడి విహరించకండి,
కట్టుకున్న కులకాంతను నట్టేటా ముంచకండి               //ఎయిడ్సంటె// 
     ఇంద్రియ నిగ్రహము గలిగి ఎయిడ్సు రోగ మంటకుండ

     వలసిన జాగ్రత్తలన్ని బహు శ్రద్ధగ పాటించి

     రక్షణసూత్రాలనన్ని సోదరులకు తెలియజేసి

     ఎయిడ్సురహిత భారతంబు నేర్పాటు చేద్దాము        //ఎయిడ్సంటె//      

ఎయిడ్స్ -  3

ఎయిడ్సనే రోగమంట ఇనుకోర పోలిగా
తగులు కుంటె వదలదంట తెలుసుకోర పోలిగా                  //ఎయిడ్సనే//
     ఎయిడ్సంటే ఏమిటో ఇవరంగ చెప్పవే

     ఎట్టాగది వస్తాదో ఇడమరచి చెప్పవే                            //ఎయిడ్సనే//

హెచ్.ఐ.వి. కణములు ఇసుమంత ఉంటేను
ఎయిడ్సురోగ మౌతాది ఇనుకోర పోలిగా
సూది మార్చకుంటేను సూడరోరి పోలిగా
ఎయిడ్సు రోగ మొత్తాది ఇనుకోర పోలిగా                        //ఎయిడ్సనే//
     ఇంకెట్టాగొస్తాది ఇవరంగ చెప్పవే

     తడబడకా వడివడిగా ఇడమరచి చెప్పవే                  //ఎయిడ్సనే//

సొగరమేళ, గడ్డమేళ సుబ్బరంగ పోలిగా
కొత్తబ్లేడు వాడకుంటే కొంపమునుగుతాదిరా
ఎట్టాంటి రగతమో ఎరగకుండా ఎక్కిస్తే
ఎయిడ్సురోగ మొస్తాది ఇనుకోర పోలిగా                        //ఎయిడ్సనే//
      కోరికోరి నీతి దప్పి కొంపలంట తిరిగితే

      కోరికలే లేకుండా కొంప ముంచుతాదిరో

      మందు లేదు, మాకులేదు మాయదారి రోగంరో

      సందులంట తిరగకుండ సక్కంగ నడవరో                //ఎయిడ్సనే//

అమ్మలార! అయ్యలార! అందరికీ తెలపండి
ఎయిడ్సుబారి పడకుండా హాయిగ జీవించండి.               //అమ్మలార//  

ది. 31.07.2004  వ  తేదీన 

జ.న.వి. వెన్నెలవలస ప్రిన్సిపాల్ 

శ్రీ ముళ్ళపూడి కోటేశ్వరరావు గారి 

పదవీవిరమణ సందర్భముగా 

వ్రాసిన గేయం.

నిర్మలహృదితో మర్మములెంచక సన్మానింతము రారండీ,

కూరిమి నిండిన కోటేశ్వరునకు పదవీవిరమణ నేడండీ            //నిర్మల//

ముళ్ళపూడి ద్విజవంశంబున తా ముదమొప్పంగను పుట్టెనటా
అధ్యయనార్థం బారోజులలో లండను దాకా వెళ్ళెనటా             //నిర్మల// 

భావిపౌరులౌ బాలబాలికలు పఠియించుటకై బహుదక్షతతో

సాంఘిక నామక శాస్త్రాంశంబులు విస్పష్టంబుగ వ్రాసెనటా      //నిర్మల// 

బాలబాలికల బంగరు భవితకు అహరహమూ శ్రమియించెనటా
శాంతినికేతన సదృశంబులుగ విద్యాలయములు మలచెనటా //నిర్మల// 

తరతమ భేదము లేనే లేదట మార్గదర్శనను మేటియటా

తలచిన కార్యము సాధించకయే సంకల్పంబును వీడడటా     //నిర్మల// 

బహువిధ ప్రజ్ఞుడు బహుళయశుండట పాలనమందున దక్షుడటా
రంగస్థలమున రమణీయముగా నవరసములనే చూపునటా   //నిర్మల// 

సదమలయశములు సత్సంపదలు కోటేశ్వరునకు కూడవలె

జగదాధారుడు శ్రీసాయీశుడు సకలశుభంబుల నొసగవలె.  //నిర్మల//   

విద్యార్థులకు ప్రార్థనా సభలో జన్మదినోత్సవ శుభాకాంక్షలు తెలిపేందుకు వ్రాసిన పాట.

కామనలు శుభకామనలు
జన్మదినోత్సవ కామనలు
మనలో ఒకరగు మన నెచ్చెలియగు
_______కివె శుభకామనలు  //కామనలు//
          శతమానాయువు, స్వస్థత నిండిన

          చక్కని జీవన మబ్బాలి

          సకల సంపదలు సదమలయశములు

          సన్మతి నీ కెపుడందాలి //కామనలు//

ఆ భగవానుం డఖిలదుడికపై
అన్నిట జయముల నివ్వాలి
జన్మకారకులు జననీ జనకుల
కాంక్షలు సఫలము కావాలి //కామనలు//
          ఇప్పటిలాగే జీవిత మంతా

          నవ్వుల పువ్వులు పూయాలి

          కూరిమి నిండగ నీకెన్నెన్నో

          జన్మదినంబులు జరగాలి //కామనలు//

          (వేడుక లిట్లే జరగాలి)    

08.11.2006

జ.న.వి. వెన్నెలవలస, శ్రీకాకుళం.

                                శ్రీమతి పి. సుగుణకుమారి, పి.జి.టి. హిందీ, జ.న.వి. 

                           విజయనగరం పదవీవిరమణ సందర్భంగా

సద్భావంతో సంతసమందుచు సన్మానింతము రారండీ
సద్గుణరాశికి సుగుణాఖ్యార్యకు పదవీవిరమణ నేడండీ //సద్భావంతో//

దీప్తులందుచును ద్విజవంశంబున చక్కగ జన్మము నందినదీ
జననీజనకుల కత్యుత్తమమగు సంతోషంబును కూర్చినది//సద్భావంతో//

పాఠ్యబోధనము బహుయుక్తంబని అధ్యాపికగా మారినదీ,
బోధనచేయుట పూర్వపుణ్యమని తనుహృద్భాషల తలచినది//సద్భావంతో//

నవోదయంబున నానాస్థలముల విద్యాబోధన చేసినదీ
హిందీభాషను సుందరమౌనటు లందరి కెల్లెడ చెప్పినది //సద్భావంతో//

ఎక్కడి కేగిన నెక్కడ నున్నను మిక్కిలి మక్కువ చూపినదీ
విమలాత్మకయని, విదుషీమణియని విమలయశంబుల నందినది 

                                                                                 //సద్భావంతో//

ఆభగవానుం డమితాదరమును చూపుచు దీవెన లివ్వాలి
శతమానాయువు స్వాస్థ్యం బబ్బుచు శేషజీవితము సాగాలి //సద్భావంతో//