న్యస్తాక్షరి

అంశము- 'శంకరాభరణం' బ్లాగుపై  అభిప్రాయం.
ఛందస్సు- ఆటవెలఁది.
నాలుగు పాదాల మొదటి అక్షరాలుగా వరుసగా
‘శం - క - ర - య్య’ ఉండాలి. 

పద్యంలో ఎక్కడా 'శంకరయ్య' పేరును ప్రస్తావించరాదు.

అక్టోబర్ 19, 2016 8:29 [AM]

శంక యేల భావసంకోచ మది యేల
కవితలల్లు పనిని ఘనత గూర్చు
రమ్యమైన ఫణితి రయమున నేర్పు న
య్య నిజముగను శంకరాభరణము.1

శంకలన్ని దీర్చు సామర్ధ్యమును బెంచు
కడు మనోహరంపు క్రమత జూపి
రయము నేర్పు పద్య రచనంబున కనుడ
య్య సతతమ్ము శంకరాభరణము. 2

శంకరాభరణము సత్కావ్య రచనకై
కడగువారి కెల్ల గతుల శుభక
రమగు భావమొసగు రమణీయ శబ్దశ
య్య సమకూర్చుచుండు నసదృశమయి. 3.

అంశము- పెండ్లి వేడుక
ఛందస్సు- తేటగీతి
నాలుగు పాదాల మొదటి అక్షరాలుగా వరుసగా
‘వి - వా - హ - ము’ ఉండాలి.

డిసెంబర్ 01, 2016 7:02 [AM]

వినుడు కమనీయమై యొప్పి యనుపమముగ
వాసి గలిగించు వధువుకు వరున కతుల
హర్ష దీప్తులు చిందించు నందరకును
మునిజనామోద మైనట్టి మనువు భువిని. 

విజ్ఞవరులార! కళ్యాణ వేదికపయి
వాద్యఘోషలు మిన్నంట వరుడు గనుడు
హర్షమున మంగళపు సూత్ర మంది యదిగొ
ముదిత మెడలోన ముడివేసె మోహనముగ.

వివిధ రకముల భోజ్యంబు లవిరళమగు
వారిజాక్షుల ముచ్చట్లు వాద్యగతులు
హరిత పత్రాలమాలలు పరిణయమున
ముదము గూర్చును సర్వథా మదిని దోచు.

అంశము- ఉత్తరుని ప్రగల్భములు
ఛందస్సు- ఉత్పలమాల
మొదటి పాదం 1వ అక్షరం 'ఉ'
రెండవ పాదం 7వ అక్షరం 'త్త'
మూడవ పాదం 14వ అక్షరం 'రుఁ'
నాల్గవ పాదం 19వ అక్షరం 'డు'

డిసెంబర్ 22, 2016 5:00 [AM]

ఉన్నత విక్రమాన్వితుడ, నుత్తర నామ సుశోభితుండ నే
గ్రన్నన జేరి యిత్తరిని గౌరవ సేనల జీల్చి గోకులం
బెన్న మరల్చి దెత్తునిదె యీరలు, పౌరులు కుందనేల నా
కన్నిట దక్షుడొక్క డిట నబ్బినచో రథచోదకుండుగాన్.